Sual leh Dik kaal ah Dingkhe Ni

🌱Sumlem ahihziak hi tuanlou in tuni apan Inde-sum Za-nga leh Sangkhat note zatna beita chihtheih hi, mun tamlou chik ah Sintawpni tan kia zat theihlai dia suksau chihthu ahi a hive'n van leina tamzaw ah 'sum' ahihna bei hita a, a keemkhate adi'n lunggimna suak hi. Sumlem kibawl a tamziak hi thou in, Black Money douna dia Solkar panlakna leng hikawm hi. Sual leh Dik kidou den a, Sual a hong haat chiang in mimal leh inkuan kia hilou in gamsung pumpi buaisak zou ahihdan kilang chian mahmah hi.

🌱Sualna sang i chihpen a khovel’ puakkhiat hilou in, a sung a teeng mihingte ziak a tung ahi. Tutung a India Solkar in amau bawlkhiat ngeingeite nasan zattheih louh dia a hon puan guih mawk un thil tampi hon ngaihtuah sak hi. Adik i chihle a dakkal hong kikhek chiang a diklou suak thei mai khovel a om i hihdan hon kiphawksak a, bengvaktak a om gige kuul hi. I Pathian thutak bel chikmah chiang in kikhek ngeilou ding hi.

🌱I Lamka Society siatdan kigen zaak ding tam mahmah hi. Sual leh Dik kidou tou nilouh lai ding bang hi. Sualna huaisetak kaal ah hon khamuangsak mahmah bel i Laisiangthou pomkip a diktatna tangkoupih ding mi i neihlai ahi. Sepna a pension a diktatna thu uh kigen a, khangsawnte kiang a atanchin leh tangthu uh piaksawn theih ding mi - Pu Dongzathang Vualnam, Pu H. Chinkhenthang chihte i neih uh hamphathuai mahmah hi. Amau gel minloh tuam mahle diktattak a seem midang leng omlai kha ding hi.

🌱Sualna sou bulhbulh kaal a i leenlai in tunai in Tuailai 1434Pro, TRVM chihte thutak a kibulphuh a, diktatna thu tangkou ding in hong kipan uhi. I Lamka khopi sung ah mi diktat - Tuailai 1434Pro, TRVM chihte a tel khalou leh mi phawk phaklouh; mimal a Pathian lau a hinkhua ana zang leng hunkuam om ngei ding a gintakna in tha hon guan hi.

🌱I khopi siatna in bawm a, mi tampi a lunglelhsak lai in i Pathian thutak in hon taisan nailou hi. Khangsawnte khualna leng hithou in michih in i maituah ngeingei ding Pathian Vaihawmna ahih phawkthak in i lampite enchain in Diktatna ah kibulphuh thak chiat ni. Lametna thak puak ding mi kisam hi. Dingkhe ni, Unau!

TRVM|COFRELA|83|PRESS RELEASE-17

(Posted in Facebook on November 9, 2016 )