Paite-te | I Dinmun Uh - Muhdan

1. I buaina uh sai di leh ei interest safeguard di (Eg. Pherzawl District apan i gam lakik di leh 6th Schedule a i gam daikai di) i Organisations 3-te: (PTC, YPA, SSPP) a langtang a gamtang om tadihlou bang. I dinmun uh dengdeldan chu theichiat hilele appropriate forum neilou le kihi maimah di (PTC - Cultural & Traditional aspects, YPA - Philanthropic, SSPP - Educational chihdan broad-tak in gen theih di; definition dik chiahbel hilou di). Tua ahihlai in i buaina tuamtuamte address thei di lah phutkhe dia le ki-om tadih louzel. Maphu dia kipei om tadihlou bang, a kawm ah panla ana om ahihleh thutuam.

2. Lamka ah ATWU makaihna a Pathian kiang a niteng a thumna om. Salphate vuikhiat ahihnung tunitan 6th Schedule demand a alangtang a Demand Committee chihdan om tadihlou. Phetlou Salphate vuikhiat nung memorandum a piak thaklam uh kitheilou.

3. Delhi ah pawlkhat in Jantar Mantar ah Protest neizom uh. Ahihhang in Solkar theihpih a 6th Schedule demand om ahi chih kichetna di'n 6th Schedule demand committee phuhkhiat omlou, Govt kiang ah Memorandum a piaklam uh kithei tadihlou. 6th Schedule kikoupih den uh chu hi, ei theihsiam tan in. Hilele Govt bil a dengkha hiam chu theilou.

4. Govt theih in hun paisa in '6th Schedule' demand a na om mahleh tuabang demand serious ngeilou chih ahi. Salphate May 24, 2017 a vuikhiat ahihnung 6th Schedule demand committee kiphutkhia hiam memorandum piak thak chih omlou. Lungkimlouhna nei a, lungkim nailou i hih uh kilatna dia bangmah hihle kinei nawn tuanlou. Ei lungkim lou i kisak lai in Govt theih a 'Churachandpur buaina' within one month a hihveng chih hita!

5. Mipite mandate pawlpite i 'land' uh protect na dia kipan om tadihlou. Mipite mandate hi chiahlou pawl kibawlte lah mohsakna ding toh ana en lah beilou. A gaal a omte'n banghiam a genchiang ua 'ground reality' na theikei uh, chih khum a om. A ground a omte lah Politics kipei vutvut kaal ah kalsuankhe thei tuanlou zel.

6. A awlmoh lou omlou, awlmoh kichi vek. Hilele action/ kalsuanna muh di omlou. WhatsApp group ah active chiat, screen addict sim chiatvek. Cynical gawpzaak, patau chiat sim, issue le theisim chiat, hilele action dia kipankhia omlou. A reality enkawm a awlmoh/ veidan gente Pathian thu zang a style deuh a ana khim pawl le kisaanzel.

7. Pil chiatsim, ngaihdan le gen theisim chiat. Ki-debate leng siamsim chiat. Atak a kalsuante'n amau mun ah limsang mahmah, hilele huaipeel ah midangte (ana gaal ette) hiip zoulou deuhbang. Arena pua a ana ente'n le a tha thohzou zawdeuhte encourage dia 'a meisa tawng deuhte chih dandan awle..', chi thei taktak tuanlou zel.

8. JACAATB in Salphate vui ding thu a ginlai in Salphate vuikhe le movement bei chihna hilou, i movement haatsem di, chi. Hilele atak a bel Salphate vuikhiat nung Sub-committee a guan teng uh bang dissolved vek uh. Pumbuk bang phel, movement thawmging zaak di om nawnlou. MTFD mahle a daihna uh sawtta. Mi tangpite zuih di neilou a hamhaih hita.

(Gengen lou a daih dide chihlah veina neite adia haksapi hizel di. A gentan a kisemkhia ana hilou zel. Kikupkhawm chu selou, hilele kial laplou chihle om thei.)