Limtak In Ngaihtuah In

Bangziak a hichi khop a i Lamka khopi ana sou hiam chih i theihsa ahi. Salphate bangle it chiat in i suun ua, tunitan in biakinn dakte kitum nailou a, i innte uah sisuun chihna in Puanza vom kitaak lai hi. Hiaite a ziak nei a kihih ahi a, kisawl haat thu a i hih ahi kei a, eimah a deihna tel a i hihvek uh ahi. A hun sawt thu ziak mai a i dinna khek i chih mi chitakte paidan hi ngeingei lou hi.

🌱Bangziak a Salpha kinei hiam chih i theichiat uh. A sawnglai in MLA & MP-te inn bang haal in ana om a, hiai in i thuaknatna leh puaknatna a taklang chiang mahmah hi. Numei-naupang genlouh mi teng chihtheih phial ding in Saptuam heutute, Kho hausate tel in pawl tuamtuam in lungkimlouhna i taklang ua, tua i lungkimlouhna bulpite uh tuni in bangmah sukdam in a om naikei.

🌱I deihbang lohchinna omlouh ziak a kiphavaang omsak i hih thoh uh. Bill 3-te lak ah nih withheld ahi chih i thei a, tuni dong in a lauhhuaina a beikei!! Salphate i chi a, a luang uh Morgue a muatmang dia i nutsiat ahikei!! August 31, 2015 a kipan i dinmun leh i hihna a dengdeldan a kilamdang naikei. Pangzou nawn mahmah lou a ki-surrender i hikei. Ana khawl khate leng thathak la ni.

🌱Mipite Movement pen election ziak a zulmang ahi maimai kei. Beita dan a ngaihtuah na hih zenzen leh Morgue va pha dih. Delhi a om na hihleh Jantar Mantar va pha dih. Na theichiang penpen ding. Election i chih tua i movement kipatna 3-Bills ahi a, hiai Bill-te Manipur Assembly a i MLA kipawlkhawmte thupukna ahi. Hoihlou ahihdan a hun a genkha kuamah a omkei uh. Tuaziak in MLA-te mipite'n boycott uhi. Huai MLA zat theihlouhte khekkhiatna ding hun hoih MLA Election 2017 ah om hi. Bang a na dinmun? Limtak in ngaihtuah in.

(Posted in Facebook on 2017 February 7)