58-Churachandpur (ST) A/C ah MLA Candidate 7 i nei ua, avek ua hun khat-ah MLA hi khawm noinoi theilou ding ua, runners up chihle om theilou ding ahihman in 7 lak-ah khat keleu gup tinten theihlel hi. Nih-le-thum gupkhawm teektuuk theih chi hilou a, kop-le kop theih chi hilou himhim hi. Khat kia guptheih ahihhang in adang 7-te melma chihna hi pahlou hi.
I tulel Simleivai khankhiatna/development sangmah in suahtakna/survival politics ahi chih kihaih nawnlou hi. Tuaziak mah in talpan hun hi a, kizekhem a kitalkaih hun hilou hi. Nidang toh tehtheih vuallouh ding in electronic storage thupitak ah i gen, kampau leh gelhte kephoih hita hi. Tuaziak in thuchiam i bawl peuhmah lei deeng pah nawnlou hi.
Tua Candidate 7-te lak a 6-te election results puankhiat a hong hihzoh chiang a opponents hi nawnlou ua, positive critics a hong hih uh thil poimoh tak ahi. Elector-te mahle hiai contest omzia theisiam a election result puankhiat ahih zohchiang a khat-le-khat ki-et soihna omte a thaamden mai lou a, Kristian ethics hoih toh humane values pu kawm a informed citizens leh concerned citizens i hihkhawm diamdiam uh gamsung chidamna dia poimoh petmah ahi.
No comments:
Post a Comment