1. I vek un deih neichiat kihi di - Lamka District leh 6th Schedule. Lamka District nget ding amasa ahi chite'n 6th Schedule deihhuai salou tuanlou. Tuadan mah a 6th Schedule nget masak ding hoihsate'n Lamka District deihlou tuanlou hi'n ka thei.
2. I buaina uhbel 'priority leh urgency tag' i bulhdan thu lel ahi, chileng kigenkhial lawtel lou maithei. Amasa zaw di hiai ahi, chia kikantuahna solve na ding a poimoh chu a nihtuak a ngaih poimoh a, 'kua zawsam a thusimlouh saklouh di' ahipen.
3. Lamka District mu hile'ng i gam leitang protection bukimta chihna hipahlou a, 6th Schedule kipoimoh thouthou di. Tuabang mah in 6th Schedule mu hile'ng huai 6th Schedule area nuai ah kivaihawm lemchanzawk na ding in District, Region, Zone chihdan hiam (a minzaw khatpeuh hita ve) i khen tiltel mah ngai veve kha di.
4. Ngaihtuahna leh duhthusam gam a khosa denlou a reality i et uh ngai mahmah. Lamka District hiam 6th Schedule kikoupih dente'n lohching hile i lungsim ah koikoi khua leh munte khong i kikoupih area a telsak dia lamen i hi dia? Lamka District leh 6th Schedule i deihna bel ei area sung eimah vaihawmna leh thuneihna hileh chih ziak hi peuhmah di hi-a.
5. Deihthu mai in genle'ng i deih chia bel Churachandpur District pumpi bang hi peuhmah di. Ataktak abel kho hausa i hihna leh i thupaizohna khua bel tamlou leuleu (di) hizel. Tuaziak in i thu paizohna lianlou ahih maimah chi'a i duhthusam leng realistic zawkdeuh sakmai a, a-neudeuh taak lehle concentrate zek a, i base area ah Thutak leh diktatna, Community development, Political leh lam tuamtuam a kitunding thakna consolidate dia panlak didan geel di.
6. Lamka District leh 6th Schedule demand tuaktuak di, a committee ding leng a lunglut taktakte tuak mah apan form tuaktuak di. A huamkhak area di genkhawm di, geelkhawm di, kibatsak sawm di. Demand anih a, simultaneously a paisak di. Lamka District i muh masak zawkleh huai sung 6th Schedule area hi chet di. 6th Schedule i muh masak zawkleh amin dia 'Lamka Autonomous Council' chih dandeuh LAMKA mintam hiam i deihdan penpen phuak di.
7. Tuabel Lamka District deih pawl om. 6th Schedule deih pawl le om. A deih om tuaktuak. I deih mudia lah committee chih kiphuan le om hi tuanlou; ei-le-ei kiseel seel mawk! I deih uh directly or indirectly a kibang chihtheih ahi. Tuaziak in a kitawng leh kinana di ki-om loupi; a piang nailou duhthusam geen a kitawng/ kiseel khakha kihi tadih hi veh aw.
No comments:
Post a Comment