Pu Zukholhna

Nidangpek a kipan nu’n a pasal leh a tate toh a sanggam pasalte inn ah itna singpi va kholsek uhi. Ka Nu’n hon dampih nawnkei mahleh dambang hileh a hon hihpih ding hi-a chi in leh kei mah inleng ka pute ngaihnatna ziak in ka zi-leh-tate toh pute zahtakna, itna, deihsakna leh ngaihnatna ziak in singpi ka va khol uhi. Nidang in ahihleh a zu mahmah ana kikholsek uhi.

Ka nu-leh-pa’n hon dampih nawnkei in, ka nu sanggam pasal nihte lak a khat Paulianmang Suantak leh a zi inleng hon omlouhsanta mahleh a tate leh tute damlai uh ahihman in ngaihnathuai mahmah uhi.

Tulai khovel ah khantouhna chituamtuamte ziak leng ahi ngei dia nidangpek apat ana kizui toutou tawndante kepbit haksa hiaihiaita ahihman in thulhkhak pawl leng omta hi. Ahihhang in Pute ngaihnatna beilou a, amau mah inleng tute hon deihsakna uh kiam loulai hi.

Lungsim a geelte taksuah ding ut in phalbi zingkal khat ka tapa, Thangngaihmung Suantak @Mumung, zawn a Pu-te’ inn a va kholai leeng a Pu Hausuan kiang a ka va dawp uh Pathian in hon pichinsak in Pu Zukholh December 22, 2014 in ka bawlthei uhi.

Duhthusaam bang in ka Nu-leh-Pa leh ka nu’ pianna pa ngei in hon dampih nawnkei mahleh pipi damlai ahihman in ka lungkim veve hi. Gintakkhel ah Pute ana kipak ua, ka tate mahle’ng kei sangsang in kilawpzaw uh bang hi.

Pute’n vualzawlna a pethei Pathian kiang ah hon ngetsak ua; itna leh deihsakna thilpiak tampi honna pia ua, thupi ka sa mahmah hi. A minthang pute itna kichi tulai khovel ah bei nai hetlou ahi chih ka thei thakthak hi. Toupa’n ka Pute A’ vualzawlna tampi vuk hen.

Nang le sep nuam!

Inkuan a nek zongpen nna sem ding a kuankhia a, i koppih inn ngak kawm a inn nna seem dia i kinuutsiat dekkuan in i kivaaikhakna kampau, “Sep Nuam.” A kuankhepen in, “Nang le om nuam,” kichi sek hi.

Innkuan khat i hon bawlkhiat chiang in innsung feltak a koih poimoh hi. Nek zong ding om ngai a, inn ana hahsiang ding, nek ding ana sufel ding leh tate enkaai ding kipoimoh ahihman in nupa a nekzong a kuankhiat tuak in nawngkaina tampi piangsak thei hi.

Sepna neituak nupa a hong hihchiang un ompih/ panpihtu ding neih ngai hi. Nupate omlouh kaal in panpihtupen nu sik-a nu leh pa sik-a pa a panngai ahihman in insung nna leh naupangte ama khut a kinga suak hi.

Pianna nu-pa’ itna bangbang midang apan kinep theihvual ahihlouhman in tate ei mahmah in i kep ding ahi chihziak in nupa a sepna neihtuak lemsalou hunkhop om hi. Ei society ah papen vaikuan khia in nupen inn ngak in om tangpi hi.

Insung papen nna seem a kuankhiat ding kuan a kivaikhakna kampau; insung nu’n a pasal vaikuan dingpen vanken dingteng a piakkawm in sangkil ah, “Sepnuam,” chizel hi. A pasal in, “nang le om nuam,” chi’n dawngzel hi.

Inn ngakpen in leng sep ding ana haau mahmah ahihman in kidawnkikna kampau, “nang le om nuam” chihpen, “nang le sep nuam” kichih a dikzawk kia hilou in inn nna tampi omte kiphawkpihna ahihman in a zaakle nuamzaw hi.

Nupa khokhat a i omkhawm theihlouh chiang in inn a om i zi kiang ah khaloh kikhakzel hi. Zi in i sum khaak ana muh chiang in a phulouh mu mahbang a, “kipak,” a hon chihchiang in, “i loh apan ahi. Kei sum hon hawmsawn himai lou in i loh apan ahi, kipahhuailua maw,” chia i kihou theihchiang in insung nuam neikhin ana kihi maimah eive.