Paite pau kichi pau leh okaih tuamtuam kigawmkhawm hi a, khobing
pau leh omna zil a tuam zekzek omlai ahihman in ei' pauzat i siam pawngmawk
ziak in Paite pau siam kichih theih mawk diing hiam, chih theih haksa a bang
hi.
I gen sek uh Paite pau ah leng Lamzang pau (okaih), Bukpi pau
(okaih), Ngennung pau (okaih), addg. tampi om kichi hi. Hiaite ban ah Lamka
sung kia ah leng Pearsonmun, Zenhang Lamka, Bungmual, addg. okaih, lingo, addg.
tuamtuam omlai hi. Akhang-akhang a i innkuan a i
zat uh, ei' zaau a pau kithang tuamtuam omlai hi.
Okaih khatkia Paite pau ahi chia mallaak theih hilou hi. Hiai a tung
a kigente leh kigenkha lou Paite pau a PTC in a sim tampi omlai maithei hi. Tua
tengteng theiloupi in Paite pau siam kichih ngamhuai diing mah hiam? PTC in
Paite mite a chihte' pau thei vekloupi a Paite pau ka siam e, kichih ngamhuai
diing in ka koihkei hi.
A gelhdan ah hiaite-huaite gawm diing, hiaite-huaite gelhkhawm
louh diing chih laigelhdan (grammar) PLS guidelines kichi omsawnlai hi. Sapte i
chih mai English mi khatpeuh English grammar siam hi zenzen lou hi.
Laigelhdan (grammar) i chih pen sim a, kisin a, zatkhiak tam
mahmah ngai hi. Tua ziak in ei okaih leh pauzat ah a paukhiak siam mahmah i
hihhang in gelhkhiak siam hetlouh theihlai hi.
Tua dan ahih nung in Paite pau siam kichi Paite mite' pauzatte
amun-amual a va pai a, va sin i hihkeileh siam kichih ngamhuai loupi khat hi
eive maw.
Ei' okaih zang in gelhdan diing tuh bangtanhiam ah theih theihdan
om hi.
Sumthanlian Suantak | 2019
No comments:
Post a Comment