"Ama'n i natnate pua in, i dahnate leng a po ngei a.."
Liamna pawnte toh hinkhua zang in i omkha thei hi. I liamna pawn
khenkhat damsung daih diing a om a, khenkhat lah i khannelh theih pawl leng om thei
hi. Liamna ma thuuk deuh khawng et a nuamkei hi.
Liamna ma, liamna pawn polam a kilangkhete muhkhak baihlam hi.
Polam a om, pawn khenkhat i puansilh-nikten in a khuhmang leng om thei hi.
Khenkhat leuleu bel polam a kilang khelou, liamna pawn om theilai hi.
Taksa tung a liamna a om theihlai in lungsimlam leh khalam a
liamna leng a om thei hi. I thuaknatdan bel a kibang kholkei dia, i
thuaksiamdan leng a kibang kholkei diing hi.
I taksa tung a liamna pawn kimu theite thukhat hileh mi' kampau
in hon liamsak thakthakkhakna leng om thei hi. Huchi bang in i kampau ziak a
mi' lungsim i natsakna leng om thei hi. Hiai bang liamna pawnte'n hon suknatdan
tuam sese hi. "Hiai mipa le... Hiai minu le...," chih bang zaakkhak
diing om thei hi.
Atak in om nawnkei mahleh khonung a kigen thakthakte'n hon
delhzui sek a, mi kam a thupawtte ziak in mi lak a kihel nuam salou, mahni kia
a om ut, kibukhum utnate in i gintak kheel in i lungsimlam ah liamna ma thaksakkha
sek hi.
Taksa tung a liamna pawnte i ngaihtuahleh... liamnazil in
khenkhat damsung a khovak mu nawnlou diing, khut a thil khoihkha ngei nawnlou diing
leh khe a paikha ngei nawnlou diing hihdan leng kilang thei hi. Himahleh, thupukna
a na bawldikte'n thohnawn hun chiang in bukimlouhnate nusia in kimtak in
thounawn diing uhi.
Tampi tawmkan in a khitna gen le’ng... mimal a kidotna diing a
hoih mahmah ka sak bel mi'n a thuakkhopteek a a puak nung un a liamna uh va
behlapsak diing hiam, liamna ma nasesak dia kampau khawng neihkhak theih hi
mawk hi.
Sumthanlian Suantak | 17.5.2019
No comments:
Post a Comment