I tawndan, paidan, culture chi ni, kepbit kuul i sa hia chi'n kidong lehang poimoh salou ki-om khollou diing hi. Culture i chih laipau (literature) leng hi a, culture leh literature khen theih hilou hi. Tua ahihman in thumal toh kisai a i houlimna, nam itna hikha hi.
Thumal kichi hinna nei ahi a, mawksih lou hi. A neitu mite'n a
it ua, a puah uhleh khangtou in sangpi ah dopsang in om thei hi. Huai ahihlai
in a neitu, a zangtu nam leh mite'n a dakbawl chiang un mangthang thei bel hi leuleu hi.
Mihing hinkhua a kikhekkhek bang in lai leh pau leng kipuah
toutou ahi a, thumal mahmah leng athak piang den hi. Huai ahihlai in thumal
zatlouh, phawklouh, nutsiat leh koihdap leng om zel hi. A zangtu, a neitute'n i
it a, i zuun utleh i thumal uh i kembit thei a, i dakbawlleh tu a tualleng
mahmah i chihte leng phawkkhak louh a mang toutou ding ahi mai hi.
Tu in ei' pau gelhna diing laimal i nei ua, niteng a i zatlouhte
leng gelhkhia in i kembit thei hi. I na phawk nawnlouh, zat nawnlouh, a hoihzaw
omta, a lemtangzaw zat diing om leh a ziak tuamtuam a thumal i theih nawnlouh
bangzah a omta dia?
Tu in i thumal mang dia kisa lellel khenkhat - phutuan, innking,
pumbuuk, zuak, dolon, singkuang, belmang, akgesawm, sawnkai, innkatau, sangkil,
addg. ahi. A ziak tuh khopi khawng a hiaite sang in local language paizaw ahih mawk
chiang in huchi thei mah ahi.
Singtang a hoihtak a kizang Lamka a kizang lou, Imphal a kizang
lou zosem, metropolitan cities bang a naupangte'n zak leng a zakkhak nawnlouh
adim-aha in om hi.
Tuate kembit diing record beek a nei diing a i panlak kisam
mahmah hi.
~ Sumthanlian Suantak 2019
No comments:
Post a Comment