Paite mite' zat 'pau' tuh Paite pau hi pah hi, tomchik a gen in.
Technical-tak a gendan tuamtuam leng a om maithei hi. Ahihleh 'Paite mite'
kichi kuate ahia, i chih nawnleh dawn baihlam lou suak thei hi.
PTC nuai a om mite 'Paite mite' ahi chihdan in leng gen theih diing
hi. I beh ziak hiam mai a kuahiam khat - Paite, Simte, Zou, addg. chih
theihlouh hi. Beh-le-phung kantan a i khosakna zil in mi' pau kizui in atawp
chia, bang nam hiamkhat va suak chih leng om thei
hi.
I beh min i khek theikei a, i vun, i rong leng i khek theikei
hi. I pau zat ahihleh kikhek thei hi. Pau i zatlouh tuh kimangsak thei hi. I
utthu hilou in kimangngilh taktak maimah thei hi. I pau zat i tate'n a hon
zatpih nawnlouh genlouh in theih leng a theih nawnlouh maimah chiang un
kilampial sau lua hita hi.
A zuun diing, zang diing, puah diing mi a omlouh chiang in mangthang
thei a, pau omsa khat apan pau dangdang leng piang thei hi. Pau khat, pau
kibang i chih leng a khua a tuam dungzui in kakhia om thei hi. Thumal i
lohkhiakdan ahih keileh i okaih a kinohdan leh i oihdan bang kilamdang in
kidanglam thei hi.
Paite pau siangtak i chihte kia ah leng kilamdang zekzek
(variations) om hi. Etsk. Bukpi pau (okaih chi zodiam?), Lamzang pau (okaih chi
zodiam?), Val pau (okaih chi zodiam?), Ngennung pau (okaih chi zodiam?), Addg.
Hiai variations i chihte tualsung khat kia mai hiam khobing khat sung a teeng
mite'n amau' zaau sung kia a zat 'lingo/slang' tuam kineihtuam theilai uhi.
Hiai variation tuam zekzekte avek in Paite pau ahi ua, hiaite
zaw Paite pau ahi nawnkei chihtuam diing omlou ahihman in avek a i lakkhop
poimoh a, huamkim (inclusive) mahmah poimoh hi. Tua dan hoih leng a na hoihzaw
hi. Paite pau a khobing pau leh okaih tuam zekzekte binkhawm sipsip zou lehang
Paite pau ah thumal kihau lotel ding in gintak-huai hi.
No comments:
Post a Comment