GAM-LE-NAM MABAN NANG NA HI

Maban neilou a beimang kiuhkeuhkhak diing thil lauhhuai mahmah ahi. Laisiangthou a kimu nam khenkhat a na mangthang ua, a tanchin uh zak diing in om nawnlou hi. Maban nei nam a hon bawl ziak in Pathian min ka phat hi. I gam uah tangthupha hong luutlou a, tutan dong omlai bang a na hi zenzen lehang dawi-le-kau lau in, khovel khantouhna theipha banlou in tuantualtak in i khosa mohkei diing uhi.

 

Dinmun sezaw a luut diing a maban nei hihkhak theih hi. Ahaute hau denlou, azawngte leng zawng den samlou, chih paunak neite i hi uhi. Maban nei napi a khovak sang a khomiallam naih a pai diing maban nei i hihkhak ding thil deihhuai lou mahmah ahi. Dinmun niamchik apan hiai chiang a hon domsangtu Pathian’ hoihna muanna toh maban limchitak nei nam hi in ka kikoih hi.

 

Khovel kikheng toutou ah aden ding chih omlou in; naupangte pichingtou in pichingte’n upatlam kinawttou den hi. A huchih ziak mah in heutu tampite’n hon tawldamsanta uhi. I theihlouhkal in upa nailou tuailai i chihte’ khut ah mohpuakna hakkol ngak in om a, huai mohpuakna tunung in tua naupanglai i chihte liangkou a kinga diing hilai hi. A hon phak ma in mohpuakna sang dia i na kisakkholh ngai hi.

 

I heutu masate’n hiai chiang a hon tun ua, hiai baan kalsangzaw suan diing ei’ khut ah kinga hi. I gam dung-le-vai i daakvelleh i luahlouh dinmunte a pilzaw leh siamzote’n a na luah uhi. I gamzaang a om DC tutphah a tu diing in kiman nailou i bang uhi. DC tutphah a tut kichi mimal aa diing kia hilou in i gam-le-nam aa diing in poimoh mahmah hi. I tenna Churachandpur district ah DC in eimi mah tu thei lehang deihhuai lua hi.

 

I khantouhna ding un i District ua diing himhim a DC tutphah apan vaiguan (project) kizeekte bang eimi mahmah in i zeek hitazenleh theih ngeilouh a gam vangla apan hong kuan kol-le-vaite sangmah in i taksap leh poimoh taktakte kithei zodiing in ka gingta hi. Laisiamna ah namdangte mah bang in degree sangpipi neite i hita ua, i District ua diing vaiguan zeek thei diing khop in Civil Services ah luut diing in kisa ni.

 

Lungmuang leh bittak a teen i ut chiat uhi. Sual in a hon maingal louhna di’n daan-le-thupiak tawitu SP chiangkhun chik chiak in ei khutsung ah a om thei dia? Hiai chiangkhun tawi diing in kuhkal leh taimak i suah ngai hi. Ngal thahatna a palkhiakthoh hilou in, laisiamna tungtawn a ngah hizaw hi. Hiai chiangkhun zang in i gamsung a daan-le-thupiak a mohpuakna saang diing a khangthakte i kisak uh poimoh hi.

 

District hospital hoihtak i Lamka khopi lailung uah a om a, tuni chiang in CMO leh Medical Supdt. in ei singtangmite mah i pang toutou thei ua kipahhuai mahmah hi. Tua bang ahihlai in i ngaihtuah zomleh tu a CMO leh Medical Supdt. lenkhate; sawtpi sep nung a kaisang a, tua dinmun len thei hi uhi. Hiai dinmun i luahzom theihna diing un khangthakte medical line ah tam sem i luut uh poimoh hi.

 

I gam a nopna diing in kikawmtuahna lampi hoihtak poimoh mahmah hi. I lampite uh a hoihna ding in ei singtangmite mah intekpan in lampi bawlna dia hong pai sum leh van tuamtuamte ahi dingdan mah in paisak in, thelthangsak kei ni. Ahisate ah gen theih neilou i hih in leng ei’ saikhak leh theihna a i gam zuunna dia hong pai bangbang Pathian laukawm in diktattak a i etkai uh ngai hi.

 

Laisiamna in i gamsung uah khantouhna nasatak a hon tun a, i pi-le-pute khosakna toh teh in tu chiang in sangpi ah i khosata uhi. Tua bang ahihlai in i singtang khuate ua solkar apan i muh i siamsinna innte uh a niamkiakdan ngaihtuah in puaknathuai mahmah a, a ziikngek a keugawp ding i bang ua, lunghimohhuai mahmah ahi. Hiai chiang i tun nung ua ei hun a i ngaihsak keileh kisik mahmah diing i hi uh. Laisiamna meikuang ei khang chiang aa diing kia hilou in khangsawnte kiang a piaksawn i mohpuakna ahi.

 

© Sumthanlian Suantak @ 08/03/2019.

[Note: Siamsinpawlpi GHQ Magazine a suah dia nget a om ziak a gelh ahi. A kisuah hiam chih bel theizui lou]