Pu LB Muan, M.Th (Pastoral Care and Counselling) in ‘A Tonkhawm
Nupa’ kichi koppih neisa leh nei pah diingte sim diing a a gelh laibu veel thei dia
deihsakna tungtuan a hon piakman in hampha ka kisa mahmah hi. Kilawptak in ka
sim a, lungluthuai ka sak ziak in ka sim khin pah hi. Hiai laibu melpuak -
asung leh pua in mit a la hi. Laipek leh laimal kizangte i simleh mit a diing
in a tawldamhuai hi. Pek 97 in a sah a, a sung a thutuunte leh a kigelhkhiakdan
a lungluthuai ziak in khawllou in a simsuak theih pah hi. Laibu pek taw ah
thutuun poimoh taktakte etkik theih diing in om zel a, hon navaksak mahmah hi.
Inkuan hoih lamkhiak diing lunggulh a, innsung nuam bawl ut
kuapeuh aa diing in sim chiat diing a hoih laibu ahi. ‘A Tonkhawm Nupa’ a kichih
hang in zi-le-pasal neisate aa diing kia a gelh hilou hi. Zi hoih leh pasal
hoihte omdan diing tampi tuang a; i koppih diing hiam, i tate’ koppih diing i
ngaihtuahlai in i pilvankholhna diing thute leng tuang ahihman in sim ngeingei
diing a hoih laibu ahi. Koppih i neih chiang a i koppih’ adia manpha mahmah a
om theih diingdan bang, ahih keileh innkuan manpha bawlkhiakna dia
kuul-le-poimohte theih theihna diing in leng hiai laibu sim manpha mahmah diing
hi.
Rev. Paukhanmang Guite, General Secretary, EBC in, Koppih
neisate leh nei dek lellelte awlmohna ziak a Laisiangthou a kibulphuh leh
experience pansan a kigelh, thutuun hoih leh manpha; tuailaite aa diing a sim
chiat dia hoih a sakdan leh laibu manpha ahihdan pulakna bawl hi. Rev. Dr. Khen
P.Tombing, Chief Coordinator PCI (R) in, hiai laibu koppih neisate aa diing a
theihtuak tampi leh koppih nei nailoute aa diing in leng kisakkholhna diing a
poimoh tampi kigelh ahihman in mi tampite’ sim diing a deihsakhuai a sakdan leh
a simtute’n phattuampih diing ua gintakna toh hoihsakpihna taklang hi.
Thupi tuamtuam, bawngpi thum in kikhen hi: 1. Nupakal 2. Tate
Kepna leh 3. Nu leh Pa/ Pi leh Pute Kepna. Hiaite lak ah 'A Tonkhawm Inkuan'
bawlna diing in hiai a poimohpen hiam, a poimoh kei deuh chih diing tuam omlou
hi. Poimohdan a kibat ziak leng ahi ngei dia a banban in tomkimtak in kigelh
chiat hi. Thupi tuamtuam tuun a gelh ahihman in thupi khat i sim zoh chiang in
aban sim utna hon guan hi. Thupi khat nuai ah leng thupi khennen om sawn nawn
a, tuate sau loulou in a lungluthuai diing lel in tomkimtak in kigelhsuk hi.
Laibu sitna diing in thukhitna in zom hi.
Khen khatna nupakal thu ahi. Koppih tung a mohpuakna - Pasal in
zi it diing ahihdan leh zi in pasal zahtak diing ahihdan kigelh hi. Taksa
kitenna mai hilou in, lungsim leh khalam a kitenna sim in kitenna thuah thum om
ahihdan kitaklang hi. Insung a - Koppih, tate leh nu-le-pa’ kiang a i hihna leh
mohpuakna ban ah nupa kituahna dia poimoh mahmah chi sawm-le-sagih kigelh
dindian hi. Zek bang a ngaihtuahkhak a om sek, alangtang a kigenkhe khollou -
nupa kipolhna chidamna dia poimoh leh nupa kitheihsiamtuahna dia poimoh mahmah
chi nga leng kigelh hi.
Khen nihna tate kepna ahi. Dotna poimohtak - tate kua kep diing deuh
ahia chih toh kisai in Daktor-te leh Psychologist-te’ gendan ban ah
Laisiangthou in bangchi gen hiam chihte kimu hi. Tate’n nu-le-pate suun a,
enton uh ahihdan kigelh hi. Ta-le-nau i hon neih chiang a tate’ mizia tuamtuam
omte a kitaklat ban ah tate kepna a theihtuak poimoh pipi chi sawm-le-thum sau
loulou in kigelh hi. Insung a khalam, salam leh tate kepna a papen’ mohpuakna
taklat in om hi. Ta hoih i deihleh tate’ ettontham a om diing ahihdan hon
kiphawksak mahmah hi.
Khen thumna ah Nu leh Pa/ Pi leh Pute kepna toh kisai kigelh hi.
I upat hun chiang a i dinmun diing ahihman in hon kingaihtuahsak thei hi.
Nu-le-pa leh pi-le-pute’ taksalam leh lungsimlam a a kikhekdan uh theihsiampih
a; houlimpih a a kithuahpih diing uh lawm zonsak a poimohdan kigelh hi.
Avangkim a daktor’ kiang a hohpih a, a duh-le-deihte uh bang leng dot zelzel diing
ahihdan kigelh hi. Lungngaitheitak ahihman un a poimoh luatkeileh innsung a
haksatnate hilh veklouh diing ahihdan leng kimu hi. A hun uh beikuan ahihman in
Khrist a hotdamna huang a pilut diing i mohpuakna ahihdan leng kigelh hi.
A tawpna ah thukhitna hoihtak kibawl hi. Inkuan hoihtak
bawlkhiak lunggulhte aa diing in i tuahkhak dandan a phutou mailou in
mipil-misiamte’ laibu gelhte bang sim a, suut chihtak a suut diing a kutna leh,
laibu gelhtu’ apan vualzawlna deihsakthu kimu hi.
https://www.facebook.com/RebuildRestore/
~ Sumthanlian Suantak
No comments:
Post a Comment