Independent a ding i chihte'n a dinmun uh khekkhek thei uhi. Tua
ziak in taise lou deuh leh muantak zodeuh a theih tuh party a dingte a hi deuh
uhi. A ziak tuh party khat in a manifesto a zuausan uhleh anawn chiang in
solkar bawl theilou diing, voter-te'n huai party muang zoulou diing ahihman un,
chih Pawl-X sinlaibu ah kizil hi. Huai dan ahihleh...
2015 kum, Khodoukha (Aug.) 31 ni a bill thum tungtang ah
singtangmite panpihna ngen diing, a kahna aw uh zasak diing in Delhi ah MTFD heutute Outer Manipur a Congress ticket a
ching MP kiang a a va innlut chialpilai un a na limsak kei a, khasetak in a
hong kik uhi. Congress MP in panlakna neuchik leng a neikei petmah hi. Chikei
ve, Manipur a Congress solkar mahmah eive aw, Lamka khopi a luang kua kikhamna
tuntu huai bill 3-te posuahtu leh paisuaksaktu... I awi na hiam?
2017 kum a MLA kitelna a Lamka (Churachandpur 58 A/C) a BJP in
muangtak a party ticket a piak pen un a manifesto pichin diing in sixth
schedule thu ah tuni dong in kalsuanna a nei naikei hi. Sixth schedule gen diing
a chih ziak a a na vote i hi himhim hialeh... I awi na hiam?
Ahihleh bangchibang ahia mipi palai dia na deih, ahimhim in?
Mipi' tai theihna party mo, tai theihlouhna party? A manifesto pichin sawm
party mo, manifesto pichin dia panlakna neilou candidate sponsore-tu' party mo?
Kihingkhem touhtouh theihlai mah diing hiam? Lamka mipite'n vote i piakdan un i
hihna khovel' mai ah i puangzak nawn sin ahi ngal a!
I deihtelna ei' mimal thu ahi. Ahihleh kum nga sung saipi
vuahthuak a i thuaktouh diing ngaihtuahsau hetlou in i va nam zel tel dia hia?
Mi' kamzol a puk zel mai diing maw? Mi piching i hi a i kingaihtuah pha diing
uh. Sum note peek bangzahhiam a i sia-le-pha theihna eimah in kisiikden tel diing
i hiam?
Aw.... Abner, mihai sih a si diing na hiam? Na khutte heen a
hikei hi!
No comments:
Post a Comment