KHUT langkhat a Mobile Phone len-in a langlam in ka kho-ul ka nulkawm zel hi. Gennop tampi nei mahleng ama’n hon thei mahmah lou ahih leltak chia’n ka gennop ka genthei pahkei hi. Dangbang awksim zen-a ka kigenchiang zoh-in ka hong kisaang thei panta uhi.
Amah ka na theihkhakdan leh ngai-a vulzen ka na hihdante ka genleh gintak haksa bang a sa a, himahleh k’ong kihou touhtouh chiang un a hon theisiam khong hi.
“Huchikhop a honna it bang na hon ngakzou kei a eivoi!”, a hon chi a, ka lunglen hon supuang thakthak hi. Ke’n leng theihpatawp a zong himahle’ng suimongh hilheel ka hihdante gen in, “Tuabang teng ahihman in Sian’ gawmlouh hi’nteh chia ka kimpih ana nei mai ka hi.”
Nungak denlai ahihdante khong ka theih-in hunlui samkik thei hile’ng ka ut ngei! Ngaihzawng chihleng nei lou ahihdante hon gen zawkmah chia’n ‘huai’ hunlai a ka itna a hong thaksuak a, tua ka hihna apan kisuutkhe thei hi maile’ng ka utphial. Huchia ngaihtuahna a paizang lailai mah in zi-leh-ta nei ka hihdan ka kiphawk zel a, lungsim a hong puangthak-guih itna ka khaamdai zou hamham hi. Himahleh hiai ka theisiam theikei: ‘Kimzual Guite’ kichi nungak ittu-tak bei in maw a lenlai tel?!! I, ahi theikei. Hichikhop a ngaihhuai zaw ittu-tak neilou in a omkei ding, hon kheem ahi ngeingei ding...
“I Aw… ka it, eh! (chikha)… Kim, ka hon mukheta a, himahleh kei’ lam hithei nawnlou hita a maw!! Kei hon(na) itbang a hon ittu, pasal hoihtak na neih k’on deihsak”, pasal a neih taktak ding phallousim liailuaipi in ka chi thei khong hi. Huai kum-8 zoh a Lamka a hong kiknawn a ka lawmte’n a hon pawtpih ngamlouh lai- ‘a awn laitak’ hi zomah ahihdan a hon hilh in ka lunglai luh hina e aw! Ahitak genle kum-16 kichi hun sawtpi ahi. Ka neu-ngaih ahi a, huailai a amelpuak, asam-style, amit-hah neem didiaite a kibangbang lai diam, chihte theikei mahleng ‘Kimzual Guite ahihna-tak’ in kei adi’n a special sakden ding hi. Na aw ka zakbang in na meel leng muthei hi laile’ng maw… Aw, khatvei bek!
Call duration ka en a, 45 minutes vel kihou ka hi uh. Zaang-huai ka bang a, lah gik lelu hi’n leng ka kithei zel hi. Zatam vualgen itna ana veilua khat houh ka de-aw, chi’n kei-le-kei bang ka kidong thakthak hi. A zaan bang lungkimlua kisa in ka ihmut nuam zozen hi.
Huchi’n, call zel, leh a chaang in ka SMS a, ama’n leng hon reply zel hi. Kei-le-kei ka kisiamtan na lel hiam maw, ‘as a friend’ maimai hi, ka chihlai in contact-lou in ka om theikei. “Na meel ka mu nuam himhim”, chi’n ka lemlak a hon ngen a; ama’ a le a hon khak hi. Thuklut deuhdeuh ka hi ngei dia a lemlak ka en vungvung sek hi. (hiai a limlaak ka genpen a facebook photos ah a koihlai hi)
Melhoih sa law lailai ka hihdan ka hilhleh ka thuklutluat khak ding lau ahi dia, “ka photo delete mai aw”, chi’n a hon sawl a, kenle deihthoh mahmahpi ka delete pah hi. Zi nei ka hihdan leh ka zi-le-tate tulel a ka pi-leh-pute ompih a inlam a om ahihdan hilhkhin ka hihman in, “Zi nei hoihlua na hi. Na pi-leh-pute a hon itpihdante- kei hile’ng huchi khollou khathei ka hihman in hamphalua na hi”, a hon chi hi. Kipak chih di ka hi hia, ka omdan a lem hetkei!
Mel kimutuah hikei mahle ung ki-contact zel in k’ong kineel mahmahta ua, hinkhua ah kipahna-thak nei hi’n leng ka kithei hial hi. Hichibang a ka “Senchil Lianu’ toh ka ki-contact gigepen zi neisa adi’n ahi ding mah ahi diam, chih khong ka kidong zelsam a; dikloudeuh a theisim napi ‘as a friend-dan’ maimai chu bang poi lah hilou a, chi’n ka kisiamtan sukzel hi.
Pasal nei dia deihsak mahmah napi, nei taktakleh tuadan a kihou thei nawnlou ding chih ka ngaihtuah chia’n pasal a neih khak ding bang ka lau thakzel hi. Itna zaw angmasial lua ahi ngei dia hithei nawnlou ka hihnung natan in leng midang adia phal tuanlou in, amah ut hia chihle theilou napi, ka lawm’ kiang bang ah, “Kimzual ka houpih dia, ka gen zohleh, kei' neih bang a ka pom di’n nei mai in.. Midang adi’n ka phal theikei; kei lah hithei nawnlou ka hihchiah”, ka chi guigui teitei lai hi. Himahleh ka lawm’ adi’n ‘Kimzual Guite’ in special tuanna a nei kei. Na ka sa! poi ka sa!!
Tawlpihlua ka hihman in, hithei hileh itna thuktak a pal sang in itna-tak theilou a hinkhua mawlchik a zat ka teelzaw. Lah, ahi thei sikei. Call-lou in ka om thei kei a; ka call chiang in lah ka dang a taak deuhdeuh a… Huiha!! Kimzual aw, hon mukhe thaklou himai leng maw!!
Huchi'n................
Awl in ka hinkhua nungkaih-vei ahihdan k’ong kiphawkkhia a, ‘fantasy khovel’ apan khanloh ngai hitah, chih k’on theisuah hi. Saultak Paul in Galatia 6:14 a ‘..Khovel kei ading in kilhden in a omta, kei leng khovel ading in kilhden in ka omta’, a chih ka lungtang ah a hong kilang chiang ngei mai. Oho! Hiaitak eive! Ka na palsau law mandek! Ka zi’ maitang en-a Pastor leh saptuam theihpih a anuam-ahaksa ah k’on it tawntung ding, chia ka na kichiam in sautak gen nei hidan ahi ve chihte ka hon phawksuah hi. ‘Zi/ pasal nei (di)a thuchiam ka bawl in nungak/ pasal dang lungsim-guuktak toh enthei ka hi nawnkei.’ Ka pa’n leng hiai ana theichian mahmah hi ding hitah! “Kim, nang adia Pathian in a siam taangpa siang zuan di’n lungsimtak toh k’on khakhia! Simlei a vualzawlna chiteng dong-in sang tampi’ nu hong hita in aw…’
Nupa-kal buai tamtak in hiaibang thuchiam ahihna bangbang a muchianglou hikha ding uh eive, k’on chi theita hi. Kua siangdang zotding ka neihlouhlai a, khiatlah tuan dingle neilou a, lungsim teng mahtoh it-a ka na mitsuan - ka zi’ lungsim hoihna leh mellawmnate chiangsem in ka mu theita a. Kei adia gin-omtak a anuam-ahaksa ana palkaidante ngaihtuah in kisiikna, ki-awilouhna liantak ka nei hi. Kipahna thak toh Kimzual Guite hi nawnlou in ‘KA ZI, Khokhawl’ k’on houpih zaw aw… a’ maai taang hial di’n ka gingta, Tlats in! Ka zi mah leng itna-tak dawn nuam a ana dangtaak law mahmah ahihdan ka musuah a, a pe dingpa gin-omlouhdan k’ong kimusuah a…A new chapter has begun in my life!!
[Author’s note: ‘SENCHIL LIANU-I’ sutzop sawmlou a ka omlai in nungak Elizabeth, Siliguri a om in na thugelh in positive leh negative impact a neithei ding, hon chi hi. A negative impact a gensauna ah- zi neisa nungak a lungleng thak dia mi inspire thei ding, chi hi. Lawm Lambawi, new Delhi, in na thugelh “Lakloh deuh ka sa”, chi. Huaibangzel in Lawm David Son in ka thiltuah saupi ana hilhkha ka hihman in ‘Senchil Lianu part-II’ ka gelh mai diam, hon chi. Deihsaktu khenkhatte hon compliment hoih taktakte ziak in hiai ‘SENCHIL LIANU-II’ hong piang hi. Amaute tung ah ka kipak mahmah.]
©Lian Suantak @17/11/11
Senchil Lianu-I na sim nopleh hiai click in: http://lian-suantak.blogspot.in/2011/08/senchil-lianu.html
[Ka ki-contact zeellai un Siliguri ah ka om a, Kimzual Guite chu Gurgaon a om ahi. Mel a kimulou in, phone a ki-contact ka hilel ua, himahleh relationship thuuktak ah ka na lutman (phial). Delhi a sepna ding calling letter ngaklel ka hihdante hilh in 'huchia dam a Delhi ka hong tunleh, Jocob in ka tapa Joseph hingdam a omlai ahihleh ka va mu ding, a chihbang deuh in, "Singpi nou khatbeek k'on khilai ding" ka chi hi. Himahleh ka kiphawkkhiat apan ki-contact nawnlou in, a Mobile no. bang ka delete a, kithuzaak nawnlou in ka om uhi.
December, 2011 in Assistants' Grade join di'n Delhi ka tung ngei a, huailai a Kimzual kiang a ka gen/chiamsate phawk in suk pichin hoih ka sa hi. Himahleh, ka chiamsa bang in singpi noukhat dawnpih di'n contact thak zelleng singpi nou khat ka dawnpih khit chiang in lungkim kisa in ka mangngilh zou diam? Ahih keileh dangtaakna thuukzaw ah ka lutkha diam, chihte ka theihlouh ziak in, a hoihzaw ding theilou in lungngai in bangtan hiam ka om hi. A kiang a ka gensa, ka tangtunlouh in amah a sukpoi khak ding ka gingta kei hi.
Ambience Mall, Vasant Kunj a anau sepna bang ka va pha a, anau kiang ah ka va kigeen dekzel a, ka kibreak zel. Tamveipi nungkaih vei in ka om a, himahleh kideek teitei in ka om a, thuak mualsuah theihzaw ana hi saam ve, a haksa deuh a hive'n!
2011 December apan kimuhna chance nei himahleng mahni kithunun in a chang in lunglengtak bang in om mahleng, lunglen ziak-a sih chih zaw ana om hial samlou hi ding eive. Huchi'n awl-awl in ka mangngilh thei hiaihiai a, a-effect zaw om nawnlou bang phial ahita. Hiai bang mahni-lungsim kizohna omtheih ziak in hiai teng ka gelhbeh thei hi. Ka Zi mah ah ka ginomna a lat ding ahihdan ka mu chiangta ngal a.... ~enlarged @ 17/5/2013]
 |
| Jantar Mantar, New Delhi | protest against 3 anti-tribal bills |
No comments:
Post a Comment