OFIS kaitawp khomial nuai ah Bus in ka tuang niitniit ua, Traffic a jam naksim ziak in munnih-munthum ah ka khawlzel ua, nitak dak Sagih-leh-kim pelta hinapi inn tunna ding gamla lawlai hi. Huchi'n Bus sung ah kinehtak a ding-in k'ong ki ngaihtuah a, hunlui leh mahni taksa-pum suutvel in…..
Aw, a khua mial mahleh ngaihtuahna chu pai zarzar theilou dia khomial chihte omlou in a taai zurzur mai hi! Mihing ngaihtuahna thahatdan leh a paizangdan mai chu aw… Atak in khovak-khomial om mahleh ngaihtuahna chu daltu om hetlou in a paizang tel mai! Paitang dundun in hunluite a hong dawk liamluam ua; teirol tung a sam Style deihdante bang, mel-leh-puam hichi zodeuhleh chihnate bang, ka hiaisan hichi zodeuhleh chih ding lah beilou. Aziak chu mi ngaihsang kinei a amah i batlouh nate peuh i phunna dia kizang ahih laitel chiang in maw!!!
Akua-akua hitele mi ngaihsang neilou omlou phial di'n ka gingta. Ke'nle ngaihsang bang ka na nei teisam a, adin sandan, a mit hahdan, agamtat-khoheidan, a paudante chihte ka en vengveng sek a, ka batlouhna tam-in atam! Din sandan leh vun rongte zaw ka khektheihlouh ahihman in ahibang in ka koihmai a, himahleh sam style veel chu etton ka sawmsek a, asam sathau zat Company-te a sese bang ka hon zang teisam hi. Apau khiatdante, a aw suahdante bang chiing in Dailen-buuk sung bang ah Training naktak in k'on bawl a…. eh…eh…eh….. ka bang thei mawngmawng kei hi.
A puan-ak zepdan vel, apuak-ak baan leptouhdan vel bel hihthei thou hi’n ka kithei. Himahleh, mi hon entute’n kibang a hon sana di uam ah, chihzaw ka thei tuankei. Mi kipahna dia chiamnuih a bawlbang in k'enle ka bawlthei thou hi’n ka kithei a, a lasak siam leh laamsiamdan bel ka hihthei hetkei chiitchiat sese hi.
Ngaihtuahna pai sausim ahi dia theihlouhkal in inn ka tung hi. Limlang mai ah ding in hoihtak in k'ong ki-veelchian taktak ta a….
Mibang in ka lu ah sam a poudim a, ka tal ahihleh mipil leh fel huntawkte’ a bang geih in a kolh sau lokei a… Mit nihmah nei-in ka bil bang leeng mi thugente zachiang ding hunlel in a lawk khengval kei a, ka nakbang le saimawl bangzen a asau ngeungou louhziak in ka lungkim hun mahmahta hi. Kamsung ah ahiam setsot hate a om sesouh ua, hilehle ann haai-a kam ka chih chia'n hong dawkkhe teitei a om louhziak un ka ha-te a bawlpa'n lemdik mahmah hina tel e, ka chi nawn a… Ha lepdan in chuh, 'leppihpa laukha ka ngai…' chia zaila oih a ngaikei rengreng!
Huchi bangzel in ka pumpi kahiang tuamtuamte ka ban-et suk a, ka khutzungte bang ka sim thakthak a, a khatlam ah guk leh a langlam ah li a phatuan kei a, nga tuakpha in thil lawn(touch) chiang in a taak-leh-nip chihte theithei ngei ding in thil theihtheihna(feeling) hoihtak piak a om ka hi chihte ka hon thei suahnawn hi. Tua bangzel in ka khezungte leng ka en a, asam omlou in leh a vaal, a hapna chihte le om tuanlou in Pathian in a hunlel ngen honna pia hitah chihte ka thei deuhdeuh hi.
Ka khuukte bang le ka laai ah a om kei ua, ka laai mahle ka biang khong ah a om se tuankei a, Siamtu chuh a thilbawl ah bawlfuhna ahi chih ka mukhia hi.
Inkong bang ah pawtkhia in vanlam en-in ka daaktou nawn a, meipite saang sa mahmah in, "Aw..ka din saandan le hunlel eive" ka chi nawn hi. Meipi bang le niam sa law mawkle chuh Over-height deuhkhat ka de aw kichih theih mawk ding hia. Kalsuan tuanlou in nuailam ka hon ensuk nawn a, "aw... ka mit level apan leitual ngumkiak-ek dingbang hileng kiaklup theih ding ahih chi'ah mi niamlua hilou hi'ng" hon chisak zel hi. Ahilel gen in, tantawk a lungkim khat houh ka mai diam maw!!?
N.B.: Kuahiam piandan a ana lamdang zekte muhsitna/demna a gelh ahi kei a, leisure reading ding leh lehkha gelh kizilna hikawm didan a gelh ahi ~ Author
© Lian Suantak @Jan.2011.
[Hiai thugelh Lawm Khamchinlian Tombing in 'Kei mipa kha' chih agelh ka simleh lighter vein a sim theih ding thugelh khat gelh nopna hong piang; a ngaihtuahna zaangkhai saktu ahihkhakleh chih tupna a gelh ahi. ~Enlarged @31/05/2013]
No comments:
Post a Comment