Hiai thugelh “Zogam’ khandal - Protection Money” 12th July 2010 a lawm Kam Khansiam Ngaihte in a gelh Zogam.com a kisuah kupbehna ahi.)
ZOGAM hong pallun hen chih zaila a awi ihih kei-a athu in gelhni i chihleh hiai bang thugelhte khong manpha ka sa hi.
Hiai article a gelhkhak a om 1999 incident kha a zakha tamtak om a, hilehle a theichian taktak kitamlou hi kha ding hi. Kam Khansiam Ngaihte kha huailai a ka college uah SSPP Branch President ahi a, ka College ua Student body tuamtuamte lak ah SSPP in member haupen hi. Amah kha mi kuhkal leh chitak ahihziak in, Zodawn background apan himahleh College pumpi a Science Stream naupang 140 vel lak ah Pawl XI final Exam ah a nihna in pangban a, Free tuition Scholarship mu hi. Huchi-a Pawl XII Session a hong kipat dingkuan in Monthly Tuition Fee Rs.180/- apan Rs.250/- in College Authority in hon puang guihmawk! Lamdang kisa chiat. Naupangte'n mimaltak in tam khan kisa mahmah chiat hi.
Tualai in SSPP President ahihna toh kiton in ama’ Tuition Fee awl di himahleh a member-te haksatna a khualman in College authority-te kiang ah Fee toh kisai naupangte haksatna kigenpih leh solution khat om thei ding chi’n pan honla hi. Himahleh College thuneitute kha… bang thu om hiam? approachable mahmahlou uhi. A huchih chia'n zaat tuamtuam a naupang Zillai, SSPP, MZP, HSA, CSA, ZSP leh vai naupang omkhate sou hon dawpkual in Non-Violence Movement khat kipan hi. Huailai a Non-Violence deih a athilgen thupi kasak mahmah ahihleh, "Non-Violence ahih ding; Violence ahong hih ngeingei leh kou a heutute kitawp ngal di ka hi uh”.
Kuki-Zomi zaat kaal-a buai zohphet ahihman in naupangte le poisak neilou sim ngen ahihlai a Non-violent tak a ahon pii zoh ka khonung ngaihtuah chia'n lamdang ka sa. Ban ah, Student body tuamtuamte khekhat a ding khawmthei dia ma hon laakdante thupi ka sa hi. Chihbel huailai ale tulai mahbang in eilak a zaat tuamtuamte lungsim munkhat a ki-omkhawm theilou himahleh khekhat a kiding khawm thei mawk hi. Atawp in College thuneitute’n hehpihna toh a’ naupangte hon-en in Monthly Tuition Fee Rs. 220/- din lem hon sakpih uh. Huchihlai in Authority dang, ZRO/ZRA hong kigolh in Heutu-naupang Meeting nei di'n hon samkhawm ua, a tellou om theihlouh chi uhi. Huaihun ah Thunei tungtuan heutute’n thulou-halou in Rs.250/- mah hong hisak uh.
Naupang a pau masa puakkhiat a om in ekbuk sung tung geihngal ahihman in naupangte adi'n paungam ding vual hilou hi. Huaipa tu'n sepna nei in a zi leh ta toh Delhi ah om hi. A khonung a chu hon khahkhe pah vanglak uh. Mr. Ngaihte in ama’ pun nang omhetlou a a-student pihte khualna a pan honla hi. Huchikal ah zankhat mi bangzah hiam toh ZRA-te apan thagum a soisakna tuak in, thagum toh hiai movement ZRA pawlpi in hon hihbei saksawm uh. A tawp in imposed solution a hong om a a-Free Tuition Scholarship bang hon taanloh zomahlai. A thuakna thu mi dangte kiang ah gensawn tuanlou ahihman in tamtak in kithei khalou hi. A khonung a College thunei tuten a Free tuition Scholarship hih hingsak thak uhi. Himahleh, tuni tan in a tan dia kilawm pahtawina piak malak in 'helna pante / strike bawltute' chih in om hi. Hichibang heutu tulai in i gam in poimoh mahmah hi'n ka thei hi.. "Mahni lohkhiatsa bawn chaan ngam."
Tulai bang-a thutak gen theihnang platform hoih kinei lou a, konglai khong a mi chitak dia i muan dedeuhte kiang a va kitai dongdong in i dikna va kigenpih mai. Kuamah hong panpih ngam lah omlou!! Khasetak a imposed Solution hong om chillum toh i valhlai hunte tu'n kimangngilh thei dek panta. I Zomi naupangte'n hiaibang thil hon tuaknawn keile uh chih ka deih mahmah hi. Huailai a thuakkha naupangte tu'n sang pipi tung bang omta: Assistant Commandant, MPS, Foreign language Professor, Doctor, India vaihawmna Parliament innpi a nasem leh Engineer khong. Ban ah, India khopi Delhi bang a SSPP JHQ President lenthei leh tuni a Zogam toh kisai a kikupna platform SSPPNet moderator bang a pang theita.
Huailai a ka thiltuah uh tua Justice ngen chihna hi tuanlou in zaan a Kamsiam’ Article gelh ka sim in ka lungsim hon khoihlua a, tunung in hichibang i gam ah omnawn ngeikei leh chih deih in k'on kum hi. Kua hiam hon hetkha sa a omleh heh mawklou in ei-le-ei kisuut thakna in zang zaw din ka ngen hi. Thuneihna i tawi ziak a thagum a vaihawm mawkpen a tawp ah a hoih/hoihlouh hong kilang ding hi. Tulai a naupang i chihte’n tunung in hun paisate chiantak in hon suutlai ding uh ahi chihthei in thuneihna i zatdan kiveel chiat ni.
© Lian Suantak @ 14/7/2010.
[Hiai thugelh kuahiam siatna ding deih ziak a gelh ahikei. Ka na kaina uh college suk minsiat sawmna leng ahi kei. Banah, ZRO/ZRA pawlpi dikloutak a ngohna leng ahi bokkei. I gam a siamsinna munte a i ta-le-nau siamsin lellelte tunung a i nam makai ding bang, khotang heutu bang hong hi ding ahihna uah a thiltuahte uh hon bulsuut hunchiang ua khasiatna khitui a nuullouh uh deihsakhuai sa in leh vaihawmna i tawite dik-le-tang a zang a, apau zouloute nengdeentu hi mailou a aniam-leh-sangte adia thulai geen pawlpi ihih deihhuai ka sa petmah hi ~Enlarged @21/5/2013]
[Hiai thugelh kuahiam siatna ding deih ziak a gelh ahikei. Ka na kaina uh college suk minsiat sawmna leng ahi kei. Banah, ZRO/ZRA pawlpi dikloutak a ngohna leng ahi bokkei. I gam a siamsinna munte a i ta-le-nau siamsin lellelte tunung a i nam makai ding bang, khotang heutu bang hong hi ding ahihna uah a thiltuahte uh hon bulsuut hunchiang ua khasiatna khitui a nuullouh uh deihsakhuai sa in leh vaihawmna i tawite dik-le-tang a zang a, apau zouloute nengdeentu hi mailou a aniam-leh-sangte adia thulai geen pawlpi ihih deihhuai ka sa petmah hi ~Enlarged @21/5/2013]
No comments:
Post a Comment