NORMAL loutak in ka mit hatlouh ziak in mitbulh ka hon bun a, dongkholh lenglong mahleh ka thil muhdan a chianzawk ziak in normal zaw hi in ka thei hi. Ahi alah, nidang a ka mitte hoihlai bang in nuam(confortable) ka kisa hetkei a, a glass-te nulsiang tum in ka romol ngou vilvel in ka nul thakthak hi. A powerte khatlam minus 1 leh a langlam minus 3.5 ahihman in normal lousa hinapi normal lou behlap ade aw, ka chi nilouh hi.
Mitbulh thak bun reurau kawm in ka hong daak deuhvel a. Nidang a i singtang hinkhua mawlchik himahleh ana thovendan, a galmuandante ka muchian mahmah hi. Khamkhop buh ka khohkhiat zohlouh chiang inle hon panpih nuam mi a pumdim a, Pathian vualzawlna toh ka khamval ka khohkhiat kum inle mi a neilou zawte panpih in khota hinkhua normal-tak in ka na zang uhi. Himahleh i tulel Zogam ah kihehpihna leh itna om nawnlou phial hita a, thil himhim adik-atang a pai om manglou phial hita hi. Phetlou in, Pathian in hunta a chihma in i khovel hinna beithei gige dinmun ah i ding ta a;.... normal lou aka hia!
Ka mit diklouhziak mah a diam ah, thil ka muhdante ka lung a tungkei lawtel mawk hi. A diklou mah a hihziak hia, A'ik'eh, ka muhdan diklou himhim, chihte zankhuakhua in ka ngaihtuah ekh sekmawk hi!
A gui a tunlouh ziak hi hetlou in, connection bawl mahle'ng ka insung ah a normal ding bangtak in Electric a vaak theikei hi. Tester in test-sek mahle'ng ka insung a agui leh a bulb-te a siatna om hetlou hinapi; ka poimoh tata chiang in a zat theihkei mawk a, a fee sunna Receipt peuh ka en thakthak a, a hun-hun a kisung lah ana hi ngal, makh ka sasim a.. “Aw a bulpi a normal kei a eive", chi'n ka kihehnem zel hi. Kei insung a a-normal ding bangtak a electric a pailouh thukhat hitaleh, Zodawn ah meigui a paisuak vekkei zomah hi.
Huchi-a khateng a Electric fee piakna receipt-te ka etlai in ka khua a hong lum hemhum a ka kho-ul bang a hong kaaimawk a, kisil ut chi’n ka Tinpi uh ka honleh, “maizen tuilah omlou!…” Nidang a ka pipelawngte lah a ngeingeilai hi-a bangchidan amah de aw chi'n, a Lamka pumpi tuinek haksatna ka ngaihtuah kha nilouh mawk hi. Huchihlai in Khuga Dam Canal tui in phusia chih ka za leuleu a, tui tamna leh a tawmna ka mitbulh bang in kikhai na deuh e maw?? Tui natan i Zogam ah neksenglouh a apianlai in nidang hunte bang in i Zogam khopi chia i kisaktheihpih mahmah Lamka Khopi ah kidaihzou nawnlou in,.... normal lou ahi ta maw!!
“Kim, tulai i Zogam' adia normal mahmah - Bandh lah kigenloupi, Gari tai tawmna mawk e, bangchidan ale?” ka chihleh, “Thautui kimulou. Normal tak a black a leidi chuh tam-a-tam. Ei-le-ei kigawt-in Bandh bang i bawl pahpah ua, i Bandh-pih uh; ngetna hoih taktakte mu di i ta d'u aw, chia i kilam-et sim chiang alah Bandh bang hon khahkol/tawpsan thepthup zel ua, i ngette uh lohching chihlah om ngeilou. Mi nautangte'n haksatna namenlou tuak-a i pat vanglak uleh lohchin matan chi'n sunzom theile hoih ding hia.. Huailai a bandh ziak a tua thautui muh ding omlou aka hia. Black a lei di-te Vaan apan hong ke tuam adiam ah?, ka chi ve. Huaikia genlouh, Tungnungte'n Nuainungte' tandi teng huai pompom ua, Solkar apan hi in akoi apan hitaleh, bangteng normal lou gaivek aka”, chin hon dawng momolh hi.
Zodawn a tengte, imi-isa ngekngek hi ua, himahleh Solkar in Scheme tuamtuam zang a apuah sawm nate uh, amaute adia nuam zodeuh a hintheihna ding lampi, school, tuinek, damdawi innte bang dia nelhsiah a omlai tel ade aw? Ahi dingbang a puah a a-om theihlouhna ‘sumte’ apaina dimun a paisaklou a heikawi/ whuai pompomte eimi mah hilou hile uh adaan khat omlai ding hi a!!! I bulpi mahmah i kipatna ngekngek i Zodawn ah a zuun di'n Solkar in Teacher nna bang hon pia alah va teng-a, va-sep lah sawm tuanlou chihkhong normal mahmah suakta a;.... normal lou aka hia.
Midang apil-asiam tampite nuaisiah a ka leizohman a KAAM nei ka hi chi mailou in i sepna mun - Zodawn zuun di'n i puanthuahte ziar in, i sepna ahih ngalleh va giaklut mai le maw, Unau?? A siamsiam in leithoh hilou a siamna mahmah toh Solkar naa a hon septheih chiang un a Normal nawn dankhat a hong om diam aw…. Zogam?
Ka mitbulh tellou in hinkhua ka zangthei nawn diam? A huchih theihkei lehle a hatlouzaw lampen a hong hatzaw thei deuh diam? I Lamka khopi sung kipuahdan huntawk i sakei a, i Zodawn lamte leng naktak a i puah kuul petmah hi. A’ileh, nang ngaihdan in Zogam a mitbulh i chih bang(te) hi in na thei a?? A system sia i chih uh hi’n na thei hia??
© Liansuantak @12/02/2011 (6:30 AM)
[A ground reality theihlouh ziak a thu khong mawkgelh, i kichi maithei. A ground reality muhbatna tanzaw kinei saam ahi. I gam zuunnuam saam in Teacher bang deih in i apply a a-leek - Interview ah hou chikchik khong hon dong uh. I gam zuun dia taaklou kihi ahi mai. Ngoh ding a om tuankei, ka chimai di. Private School ah kum 7 phial teacher a seem in, teaching line lunglut lamtak le hi. Himahleh opportunity piak ka hikei. Opportunity piakna di'n le offer theihtuan kineilou mahle zaw ahi ve.
Huchihlai a opportunity mute'n paulam tuamtuam zang a 'a ground reality', a chihsekte uh zuui a kilepkhiat sanzel ding i hi di uh maw!!
School-pute i genkai khacheuh a hive'n amau kia pumngoh i hikei. Akua hitale kiveel phatna dingzaw a om chiat ding. ~Enlarged 31/05/2013]
No comments:
Post a Comment