Tutung incident kha play fuh mahmah dan uh hi ding eive, Meitei-te'n. Tribal-te foreigner suahsak na ding a a-deih dantak ua a bawl uh bill thum hon passed khum uh. I lungphu un zoulou ahihman in heutu makaihna hilou; mipi thagum toh sual-huan. Luang kua kikham zen a nohkik dia kisa pah. Tribal Unity min a kalsuan, innlam leh khualgam a omte hitaleng.
Huchi-a a hong paitouh zel chiang a a' Meitei-te le nawk kha zezenlou a ei Tribal-leh Tribal kaal hong buaikik dingdan a kilang maimah. Tawpkik thei ding vual lah kihilou ahihman in tua ei Tribal-te sung a Destabilisation ompen addressed kawm a mailam kintak a i nawt uh poimoh hi'n ka mu.
Muhdan khenkhat:
1). Minister leh MLA-te thazoipi/ kingakna taaklou ana hidaih.
2). ZRO i chihte muan ana banglou maimah. Zogam mu dia thauvui-thautang zang a hon makaih dia i na lamet lai a a-lupen apan aniampen tan in ZRO min a gam leitang hum a sihlohte ni 10 sung a leng va veh loulai uh chih ka theihdan ahi. Mipi kimin dimdem a a-om nung a leng mipite makaih dia kal a suanlam uh kiza loulai hi. Bang chibang Zogam muhsawm i hi ta a, Manipur keklou ding bang ana chita i hihna ah?? Hiai hun kaan a mipite kiman zawk hun om nawn kenteh. Mipi involvement tellou in Zogam mu nguar ang!!
3)Mipi kinepna, lametna leh khasiatnate mu a Movement JAC in hon makaih lai in zalentak a kal suanthei lou dia laainiam ding kisamlou laideep.
Bangchih ta ding:
1). Non-Naga Minister leh MLA -te phuut a ombang a kitawp omlou. YPA in amau member-te etsan/ ex-communicate uh. Huaiziak in Minister leh MLA-te va chihchih nawnlouh ngaita. I History uh genkhak teng in mohsak hi denta ding uh. Kikhelta chilou a a-hong nungkik maikei uleh denchia a Inkawte utoh mipi thangpaihna in hiaichiang chih omlou a anawk thakthak khaklai ding lauhuai sa ing. (A ziak bel thawm daita ding a de aw i chihnung a St. Peter School zaan nitak a kihaal chih zaak a om).
2). ZRO tung ah mipi khasia leh thangpai mahmah ahi ngei ding, President pu inn haal a-om hial. ZRO leh mipi kikaal gap lianpi ana hi ding eive hon chisak. Tua hichibang a i om vengvunglai in ZRO in mipi kiang a ahih ding zah uh hihlou ana hihtaak uleh kiniamkhiak a ngaihdam ngen maile uh. Hiaitan a hong venglou a maban a hon sawnlai khak ding lauhuai ana sa guten ka hi. Zomi Council Chairman pu LB Sona in moral ground a a' step-down bang a graceful exit hun bangle theihngai hi maithei. Ken chu ka chinkei chia maizumna tampi tuakthei ahihlai a hangsantak a step-down ngam ahihna ah thupi ana sa mahmah dan ka hi. Mimal kihuatna ziak a ka gelh hi hetlou a a-damdawi ahi mai de aw chi hizaw ka hi. Inn hal leh van suksiat kikham zou nawnlou a omta i hih maimah chiang a, beidothuai sa mahma dan ka hi. I society sung ua nekgukna leh siatna nasatakte kham dimdem a Anarchy om sakmai; hiamgam semsem ding i hih thahah uleh zaw poisau law petmah ding hi. Kuki-Zomi kitheih siamlouh ziak in kigaal bawl in i na kidou thethup ua dinmun setak a i omlai un ZRO President leh a Team-te panlakna ziak in i kilemkik thei ua, tua unity bang neithei i hih ziak un kipahhuai petmah, zahtakhuailua uh.
3). Tua i movement uh hon suze-awl leh dongkholh bang hi hiam chihte suut a, kihahsiang ngai om ahihleh ei Tribal-te hoihzawkna dia kihahsiang mai a, i chi hiam, huchi a kizephawk bang i omleh kiniamkhiak mai a, chizaw diam ah, i tup mualsuah thei dia kinoh tak a i pai zarzar touhtaak poimoh lua hi.
4). Mipite'n i theihsa leng chu ahi maithei. Mi kuahiam i sitpen bang inleng hoihna/ phattuamna ana nei chiat hi. Tuni a vaihawmdan sit-huai i sak bang a om lehleng i society adia contribution hoih leh manphatak ana neihsate mangngilh louh a a-phutawk zahtakna toh i et kuul hi. I gam ah hiamgamna, kithahna leh Inn hal chihte tawpsan theita mahmah leng ka chi petmah hi.
Almoh leh veina ziak a im seselou a ka muhdan bukimloutak hon genkhia ka hi a, a dik bukim hetkei maithei. Kuahiam lungsim loulam genkhak/ lohkhak ka neih zenzen leh hoih deihna toh ka gelh ahi chih hon theihpih saam ding in ka ngen hi.
Hoih deihna toh gin-omtak in,
Lian Suantak
Mobile No. 8860188616.
Hiai thugelh ziak a lungkimlouhna nei bang a om a, thei khialkha ka hihleh hon thei siamsak ding a ngen nuam a ka mobile number taklang hizaw ka hi.
Sent to SSPP Net on 14th October 2015 and is published on 15th October 2015.
No comments:
Post a Comment