A piangkhia mihingte’n a kibang a i tuah chiat diing uh sihna ahi. Sihna kichi a hi diingsa himahleh kuahiam a hong sih chiang in amah zaw a hunta mah ve, chi’n theihsiamna kinei thei khollou in; mak bang, thut bang i sa sek uhi. Sihna mah leng theihkholh theih hilou a, sihdan ding leng genkholh theih omlou hi. Himahleh a chiang mahmah bel Laisiangthou in hon hilh bang in a piangkhe photphot si diing chih ahi. Huai ahihlai in Jesu Khrist a site bel a hoihzaw dinmun ‘tanpha tang dia thou nawn’ ding chih ahi a, huai in i it mahmahte i suun hun in leng hon neem thei hi. Mihing leh misi omkhawm thei nawnlou diing chih ngaihtuahna in hon nehnousak sek hi. Jesu Khrist a ihmute tangtawn hinna tang diing in a thou nawn ding ua, huchi lousiah bel tangtawn a nat-le-sat thuak den diing a thou nawn ding ahi uhi. A damlai eite leng khatzo samsam i maban ahi!
Inkuansungmi sihna tuak a om chiang in ittak leh suuntak in
ahoih theipen in i vuiliam sek uhi. A nung bangta hiam theisiam theilou in i
suun mahmah sek uhi. Huchi’n a kum bang a hong kivei chiang in i itna leh phawk
gigena in amaute adia i hih theih nanungpen chi’n hansuang kilawmtak i doh sek
uhi. Huai ni in it-le-ngaihte a hithei zahzah samkhawm in hansuang honna vai i
sai zel uhi. Huai ban zaw amaute it mah lehangle suunna in alompi in hih theih
kinei nawnlou a hitamai hi! Hiai pen i innkuansungmi sihna tuak a om peuhmah
chiang a i hihdan pangngai ahi. Mi tuam deuh a sih chiang un bel i gaal zohleh
i va gaal a, huai zoh hansuang hon hun in i ngaihnat leh it mahmahte i va uap
hi. Muh theih in mihingte ki-itna in a bat huai tan khawng mai ahi.
I inkuante sang a i itzawk diing midang kuamah a omkei. Amaute i
it diing i mohpuakna ahi. Innkuante zoh in i itpen leh zahtakpen kua ahia? I
mizil in i itpen leh zahtakpen a tuam thei. Piandan ah ka innkuansungmi hi
ngeilou himahleh it leh zahtak mahmah ke’n leng ka nei tei hi. Ka innkuante, ka
nu-le-pa sang a leng sawt zotham tha mahmah a ka suun a na om hi. Huai leng a
ni kizom a ni 600 val a hilai! Bangziak hi diing in na ngaihtuah a? Hiai ah
saulouchik in k’on gen diing.
2015 kum ahi a, kumkim zohnung August kha, a nitawpni penpen in
chikmah a ka tuah ngeilouh lungliapna leh thangpaihna in hon bawm hi. Kei
sangsang in Lamka leh mun tuamtuam ah midangte lungsim a dawt zothamlai!
Huchi’n kei adia leng hoihlou a minthang bill thumte deihlou a kiphina in Lamka
khopi kuangzaksak bang mai in a om hi. Huchi’n mi hangsan ngalliam mi kua’
hinna tangtawn a kikhekkik thei ngei nawnlou dia laaksak in a om uhi! Mahni
deihtelna a thil khat gup ziak a a sihna mun diing uh va zuan uh leng a chih theih
hi. Huchi zahta a a na kipe lou bang hi zenzen le uh bill thumte zat in a om
mohkei diing. Kua’n a thei a?
Tua ngalliam (Martyr) kuate luang vuikhiak ahih ma in a omna uh
Lamka morgue ah ka va hoh zel a, a kivui hun un bel ka taksa in a kiang uah ka
om theikei a, ka omna ah suunna ka na nei hi, mi bangzahhiam toh. Huchi’n inlam
ka paikhak chiang in leng a kivuina mun uh ka va pha zel hi. A han uh bang,
ngalliamte’ innkuante leh lawmte toh bang ka va khousiangkha uhi. Hiaite zaw
bangmah a simtham a hikei. Amaute kipiakna toh teh in gentham leng a hikeilai
hi. Kei omna ah amaute it leh zahna in khitui nuul ni leng a om sam a, atangpi
in a sihpih uh bill thumte ziak in thangpaihna leh lungkimlouhna toh bang a
hong paikhawm zel hi, suunna neih hun chiang in.
Amaute theihgigena diing, a min manmohna diing un a kivuina mun
uh, Mata Dam kiang ah, a haan uh honna hunpi zingchiang in kizang diing hi.
Hiai hun kei aa diing in ni poimoh khat in ka koih hi. Akuakua lungsim leng
khoih chiat diing in ka gingta hi. Martyr, ngalliam i chih, Lamka bang a i
thapaihpih zezente sihnung kum thum a chin hun in bang na loh dia? Hichia
kimangngilhsak thei mai zaw ki-om lou diing eive maw..
© Sumthanlian Suantak @ 11:30 SM, 30/08/2018.
No comments:
Post a Comment