Media i poimoh lailai in ei singtangmite sung kituahna a poimoh masazaw hilai hi. Tulel et in ei singtangmite sung a kithutuahna dengdel mahmah hi. Huai bangchi hihhattheih diing chih ngaihtuahtham mahmah hi.
I buai pattung ni (31/8/2015) in makai diing om tuanlou in mipi
kipunkhawmte'n mahni hihtheih lamlam ah sihna tanpha tuak in i phu uhi. Hiai
ni, azan-azan in Delhi ah zansawtta chih omlou in emergency meeting om hi. KSO
in zan dak 10, leh SSPP in zankim dak 12 in meeting sam a; Zinglam, dak 2 in
SSPP, KSO, HSA, addg. in Joint meeting kinei zui ngal hi.
Lamka ah 2015 kum September 1 ni in Bill thumte toh kisai a
heutu hihna toh pan la diing om nai tuanlou in hiai dan a pai dingi chih leng
om thei tuanlou in mipi thangpai in i Lamka khopi kuangzak hi. Hiai nitak dak 7
in Delhi ah leng meeting poimohtak om hi. Huchi bang zel in India a state
tuamtuam ah reaction/ protest om zui ngal hi. Hiai hun tan in ZRO/UPF/KNO, Innpite,
a pau zosam om tuanlou uhi. September 2 ni in Joint Philantrophic Organisation
tuamtuam: ZSF, KSO, MZP & HSA leh nute pangkhawm in JAC phutkhia ua, JAC
min in kal i suan pan uhi, Lamka zaang ah.
Huchi’n 31/8/2015 zan/zinglam apan New Delhi ah leng Naga, Mizo,
Kuki, Zoumi, Hmar chia kikhentuamna om hetlou in ‘Tribal cause ahi,’ chi in
khekhat khai in kal kisuankhawm hi. Tuni tan in Delhi ah Singtangmite kal ah
kithutuahna (unity) kise hetlou in paitoutheilai hi, MTF-D leader pil leh
inclusiveness lungput ziak in. Kei omna mun ka theih ziak a hon gen ka himai a
state dang ah bang a chi diam ah, ka theisau kei hi.
Huchi'n Media tuamtuamte’n leng a hon delhhuan ua, memoranda
tampi phualpi solkar level ah kipekhia hi. Minister/MLA-te i neihte lah tolh
mawngmawng lou ahihman un a septute’n a phuut ngai ahi chi’n numei pawlte a
hong kipan ua, Sia Pau’ inn bang va luh in a va haalkha hial uhi. Huai apan i
movement paidan a hong kilamdang pah a, innpite a hong kilangkhe taktakta uhi.
Lohchinna neuchik leng omloupi in ngalliam tanggualte’ sakluang vuikhiak ding
thu, school kai diing thute a hong zual panta hi.
Innpi level ah clarification a hong leeng a, JAC/JPO-te sang a
poimohzaw a hong bang hialta uhi. Inpite kal ah kituahna hong sawi/lengh in
huai in ngaihtuahna nuamloupi in hon omsak hi. Poi mahmah!
Zanzek mahmah in Students Movement chi in student tampi hiai
buaina ah alom in hong dianglut nawnlai ua, JAC-te thupiak in gennei lou bang zou
hial hi. Innpite'n lah thupi kuaizou nawn manglou uh bang zomah. I muan mahmah
ATSUM bang leng hong dai nawnpianlai. Vaihawm zou diing omlou bangmai dinmun ah
ki-omkha hi.
Siluang kikhamte, liam-le-baite ngaihtuah in i movement hong
pianna ziak khawng ngaihtuah thak ni. Kilem lou a om thei nawnvual kihi lou hi.
Kilemna/kituahna diing in i hih theih lamlam in panla ni. Kiknawn thei dingvual
kihi nawnlou ahih maimah chia.
~ Sumthanlian Suantak @07/10/2015
[Bill thumte deihlouhdan kibang ahihman in nam tuamtuamte kikhenthaang lou in kipangkhawm thei hi. Achiil a i phuutlai un lungkhamhuai in mangbathuai mahmah hi. Loh diingdan lah kithei tuanlou in heutu om sunsunte muangtak in kizui diamdiam hi. Huailai a i kilam-etna leh tuni a i dinmun ngaihtuah in i kiakna uh hou lua bang maimah hiveh aw. ~Enlarged @29/05/2018]
No comments:
Post a Comment