Tawl na kisa simta hia? Niteng thiltuahte kipahna ding sang a lunggimna ding a tamzaw chih i theichiat. Huchihleh, huaite a lungkim theih ding ahi mawk dia hia, chih dotna a suakthei. Hiai dawnna midang hon piaksak theih hilou in mahni attitude ah a kinga in, i dawnna a kibang kimkei hial ding hi.
Tulai kholkhol houh ihmut hithit leh hun-awl kichi neih theihlouh ding hial a inlam thiltungte'n hon khoihkha chiat hi. August 31, 2015 ni a Manipur Assembly a 3 Bills ki-passed-te mahmah in i dinmun leh hihna dengdeltak in a hon koih. Pomtheih vuallouh ahihziak in luang 9 a kikham a, naupang neute natan in MARTYRS kichi real-life in mit in muta uhi!!
Bangteng hileh Van-mi i hihna pen hiai bill-te'n chikmah chiang in a khoihkha ngeikei ding. Tawplou a hon ittu Van-a Pa neihkhak in hon khamuang sak. Huai Van-mi hihna nang na neita hia, lawm? Khovel a mihing taksa pum a tuam i hihlai ziak in i leitung hinkhua adia poimohte i zon a i delhdelh dingzaw himah e. Hitamahleh, tuihual leh huihpi-vuahpi nuai a khamuan theihna bukim neihna ding in zaw Amah a kingak a ngai.
Lou i kuan ngei keileh awlmoh dingdan in kikoih thei khollou hi. Ana kuankuante bel Inn a tawl-om hit-hiat thei mahmah lou uh hizel. Tuabang deuh in tutung Movement ngei leng louma nei kibang hi. Na kuan munleh awlmohna leh veina na nei lian semsem ding. Midang huan va khohsakdan a na kingaihtuah lehbel kilawpna ding a tam kholkei kha thei.
A seemtam in lungkimna ding a nei tam dia. Awlmoh a nei kha khollou in gah lohding a hong om chiang in ne sam mahleh limlua ahihlam a phawk kholkei ding. Phattuam ngaihna leh awlmohna kichi kilam-et theih mahleh kiphutluih theih thil ahi kei. Mahni a-dan a i bawl chiang in awlmoh louhtheih bel ahikei zel.
Milak a va dawkloute; awlmohna nei tawm ahi uh va kichih pah dikpen louthei hi. Genuine tak a kilang thei hetlou taktak a om kha ding. Ahi a, taksa chidam buang a khatvei le dawkzou nailou i hihleh bel awlmoh i kichih; ki-etthak na ding om ahih mel. Huai ahihlai in mahni a dingngam ding khop-a piching i hih a, i positivity adik nakleh kiim-le-kiang thilte kheel ah i ngah chiangchiang leh i hihtheihtan i suahna ah lungkim theihna om veve hi.
No comments:
Post a Comment