HINKHO LOHCHING

HINKHO lohching ka nei, chi ka hi pahkei. Himahleh Hinkho lohching neih theihna ding in hindan kichian om ngei in gintakna liantak ka nei hi. Huai bang hi ding in na ngaihsun a? Zi leh ta neisa dinmun apan et-a gelh ahi. Akiang gengen nilouh lou in hichin k’on pan ding.

Ka hinkhua a - hun, hihtheihna leh keimah thu a koihtheih chiangpeuh khen thum in khenleng hinkho lohching hon tun ding in ka gingta tinten hi. Mi khenkhat in a gendan ua “God First, Family Second…” chihpen a thutuam in koih phot zezen leng. Ei thunuai a omte seh 100 pha hisak leng. Huai pansan in bawng tuamtuam thum in kikhen thei hi:-

Bawng Masa: Kei keleu a ding. Hiaipen za-ah sawmnih hisak leng. Hiaipen kei a ding mawngmawng a sehkhiat ahi. Personal Devotion, Bible simna, Diary maintain, laibu simna, ka damtheih nang ngaihtuahna leh a tuamtuam.

Bawng Nihna: Ka zi-leh-ta, nu-leh-pa, pi-leh-pu, inkuante leh nekzonna toh kisai a zat ding. Hiaipen za-ah sawmnga hisak leng. Ka inkuante taksap ka etkai poimoh mahmah a, Hiai ah amaute vaakna ka nekzonna ka huamtel sak hi. Inkuan i chih chiang in i hinkhua su nuamtu ahihban uah asetawp leh i hoihpen hun a khuampi; kingakna ahi uhi.

Bawng Thumna: Saptuam leh Khotang a kihelna a bawng thumna ah ompan ding hi. Hiai ding in ka hun omlai teng, za-ah sawmthum koih leng.

Ka hinkhua ah tua a tung a bawng kikhen diudeute kizomdan a ka koih theihchiang in ka hinkhua pai dik ding in gingta ing. A huchihlouh chiang in, amasa dingpen nanun kha; a nanung dingpen masasak kha in kilohsam thei hi.

Mahni damtheihna leh mimal hun thoveng kipelou a thildang amasa a ka koihkhak chiang in a dangte subuai baan hi. Lu-leh-taw theilou zen a khotang leh saptuam vaai a masapen a ka koihkhakleh ka inkuan mite ana thawmhau kha ding ua, insung a mohpuakna enkaai manlou in tate khahsuah khak theih hi, Meeting pai hak gige, Office pai hak gige; intun chiang a zite ana maitai khollou chihte bang kizat siamlouh ziak hi nuam mahmah hi. Tate bang in hon ngaihnat ding bang un hon ngaina lou in; Pa leh tate kaal ah gap ana omkha thei hi.

Huchi hilou a, inkuan kia a i buaidet khak chiang in mi’n khotang a kihel nadan le theilou, tanau-laina lah vehlou hon chi theizel uh. Neih-leh-lamteng inkuan a ding kia a i paisak vekchiang a leng saptuam ah, khotang ah sumchiilpa, chih kitang theizel. Nupi khenkhat inlah amau mah le kikep ngailua hinapi, “kei a dingzaw poimoh kei,” chia tate a ding kia a kizangbei, mahni a ding damdawi lah lei ngamlou, mahni kizuun ding thudon lou in Pasalte ma a tekmeel ana pukha theizel.

Saptuam heutu ana hingei, saptuam a ana kizanggai; tate ginatak a enkol manlou, sih dingkuan a kisik mahmah bang leng ana om hi. Mohpuakna i neihkhak teng bangleng vualzawlna hivek lou dia, kilep sanvek bangleng khotang/saptuam a ding khuallouhna hi theizel. Huaiziak in Pathian amasa a ka koih kawmkawm lai in kei a ding ka theih masak a, Ka inkuante a ding leng ka theih a, saptuam leh khotang a ding leng ka siit theihchiang in hinkho lohching a hing hilou ding ka hiam.

Nupa gamta khawm (31-12-2011)

Pipi leh a' tusawm (17-3-2010)

Pa leh a' tate kimawl khawm (23-5-2014)

A Filipino family

©Lian Suantak @ 2:00pm, 12/11/2014.
Published in Delhi EBCC Weekly (DEW) dated:16th Nov. 2014