PATHIAN NGAI …

 

Nisim 20.09.2020 ni in EBCC Delhi Biakinn basement ah nitaklam dak 3 in Bersarai-JNU-Vasant Area in fellowship kinei hi. Huai hun a thugen paipi:

 

Thupi: PATHIAN NGAI

 

Laisiangthou pansan: Sam nambar 42.

Sam 42:1: “Sakhi luita tui duh a a naak hawkhawk bang in Pathian aw, ka hinna in nang a hon ngai hi.”

 

Hiai Sam number 42na; Saltang mi’ thuumna ahi a, Korah tate’ la leng ahi. I Laisiangthou Nambar bung 16 ah Korah’ hihna kimu hi. Hiai Sam gelhtu in Pathian ngai mahmah hi. Bawng li in i khen ut hi.

 

Khatna: Pathian apan taisekha (v.6-7)

A lungtang kikham, mangbang

Buaizak, tui kihawt, tuilian in naih hulhul a thei.

Tawlgawp dimdemta (v.10)

Kingaihtuah: Bachia hichi lungkham tel, hichi buai tel, chia kidong

Hichia buaitak a a omlai in…

 

Nihna: Pathian in it lailai ahih thei ut (v.8)

Suun in Pathian’ it tawntungna hon lak henla, zaan chiang in la in hon houpihleh chi.

Pathian naih theihna diing, thuum theihna diing.

Pathian in mangngilh hi a koih (v.9)

A hong kingaihtuah a…

 

Thumna: Kingaihtuah in hong khasegawp. Nidang a makai ahihlai, kipahna a a dimlai phawkkhia, khasia in lungleng (v.4)

Bachia huchi lungkham/dah & buaigawp, chia kidong zezen (v.5)

Pathian, a hondampa leh amah humbittu phawkkhia. (v.9)

Pathian ah lam-etna ngathak nawn diing (v.10)

Pathian phatthak nawn diing

chih khawng ngaihtuah a om in…

 

Lina: Pathian kiang tung a, leh A biak theih hun diing bang kan/dong (v.2)

Suun-le-zaan a Pathian sam (v.3)

Melmate’n tawngtawng zomah.

Pathian kiang ah a lungkhamnate tun (v.6-7)

Haksatna, lungkhamnate; Pathian in a sawl.

 

Tua dinmun a om himahleh Sam gelhtu in a hondampa leh Pathian chih theichian ahihdan taang tawpna, taang 11 ah kilang a, mi enhuaipi ahihdan kithei hi. Pathian toh a na kithuah mi khenkhat a hun nanunglam ua Pathian toh kithuah nawnlou mi om uhi. Etsk. Adam leh Judas Iskariot. Ahi a, hiai Sam gelhtu’n bel a hun nanunglam ah Pathian kiang naih nawn hi.

 

~ Sumthanlian Suantak | Nisim: 2021 kum Taangkha 21 ni (21st September 2020)

LUNGKIMNA EI APAN I SUAHKHIAKSAK NGAI HI

 

Pathian neilou nam hi maizen le uh Aigupta saltanna apan kitungkhe zou diing vual hilou uhi. Haksatna leh bawlsiatna a tuahte uh ziak in Pathian a sam ua, a kahna uh Pathian kiang a tungtou hi. Itna a dim, zahngaihna hau Pathian aa di'n a mite haksatna gal-etsan theih a hikei hi.

 

Huchi in a kahna leh thuumna awgingte uh Pathian kiang ngei a tungtou a, Ama'n a omna van ah a na ngaikhia hi. Thilhihtheihna lamdang pipite in Mosi a thuam hi. Pharoah kiang ah Mosi leh Aron a va hoh ua, Pathian apan thutungte a va gen uhi.

 

Ahi a, Pharoah in hichimai in Israel-te a paisak nuamkei hi. Gawtna chi 10 mawngmawng a thuak nung in a pangzou nawnkei a, Aigupta gam apan Israel-te noh in a nohkhiakthoh khong hi. Kum za li val a saltan nung un Israel-te'n hotdamna omdan a hon experience uhi.

 

Pathian' hotdamna ah i poimoh teng kim mahleh i deih teng bel a kim saamkei hi. Tuipi san kaan diing a mai uah a om hi. Nunglam ah melmate a galmuh zomah uhi. Kaan diing tuipi san dantanna diing in leitang khal khat lel leng a domkha kei ua, amaute'n a zoh vuallouh uh Aigupta sepaih thahatna sual diing in chiangkang khat mah leng a liikkei uhi.

 

Toupa thupina leh hatna ziak keleu in hithei lou a i ngaih; tuipi a hon kaan ua, sepaih thahattakte amau dou ngailou in a paisan hiau mai uhi! Ahi a, gamchiam tung nailou nana na tuh gamdai ah a dang uh a hong taak a, eite bang in sabel ngaihna liantak a nei uhi.

 

Gaih seenglouh vamiim a vaak in a om ua; a tuhlouh, a khohlouh uh van an - Manna a vaak in a omlai uhi. Nisa in a haailouhna di'n meipi amau aa di'n niliim bang ahi a, zan khomial launa thengsak diing in meikuang a tatvak in a omlai uhi. Pathian hoihna ziak in a taksapte uh a mu zel uhi.

 

Tua bang zah a Toupa hoihna a muhlai un a lungsim (mind games) uah a vangkim in gaal lauhna, tuipi kaan diingdan buaina, tui dawn diing taksapna, nek-le-taak a duhzawng uh mulou kisaknate a nei zelzel uhi. Pathian in a poimoh teng uh a piaklai in a lungsimlam ua lungkim theihna bel amau-le-mau kigelfel dia koih hilou diing a diam?

 

Ei’ hatna a i lamkhiak theihlouh hotdamna a hon pia a, Khasiangthou ompihna leng a hon pelai hi. Nek-le-taak, tuisik dawn diing leh huihsiang diik diing i taaksapte a hon pia hi. Himahleh lungsim a lungkimna leh kipahna bel ama'n hon piak diing hilou in, eite'n i puaksuah diing uh hi ngallou diing a diam maw?

 

~ Sumthanlian Suantak | Nisim: 2020 kum Taangsihkha 29 ni (29th July 2020)

ZAAK DIING ZAH ZA NAILOU I HIAM? AHIH KEILEH GENHAK HIMHIM HIZAW I HIAM?

 

Pathian thu theihna diing in tulai diakdiak in Pathian thu (gospel) pen luih in kiluihthoh, piak in kipiakthoh, tulh in kitulhthoh bang khop hial in zaak theih diing in baihlamtak in omta hi. Inn kongkhak kaan ngailou in lum zenzan bang, tutmun a meekkhiak a ngaih theih leh et theih mai hita hi. WhatsApp group-te ah leng a kibang mah kituahlut kawikawi hi.

 

Tua bang zah in panlakna om mahleh lungsim kheekna, lungheina, lungtang kitapkhapna pen bel kitulhthoh hiam kamsung a henlutsak a kineksak theih diing banglou mawk hi. I lak uah kuamah in Pathian thu gen nawnlou in Pathian nasepna khawl vengvengtaleh leng ka zakha kei a ahi, ka ngaikha kei a ahi chi a paulam zong thei diing ki-om nawnlou bang hita eive maw.

 

A thu kiluikhia leh baihlamtak a nek theih mai dia hichi zah a hawmkhiak zungzung ahih nung in nekzonna a zangte leh Jesu Khrist sisan a leisa leh tatna tang a kikoihte'n i sep diing uh i hihkhak louh uh bang om ahi dia? Eite'n i hih diing a poimoh teng i hih zoh nung a Pathian' Khasiangthou in a mohpuakna zoulou zaw hilou diing eive maw!!

 

Pathian hilhial, huai Khasiangthou Pathian in a mohpuakna zoulou bang a koih i hilai zobawn uhia, Khasiangthou polhna i nget sek uh? Ahih keileh 'special treatment' deih a eilam kibawl loupi a ngenngen khat i hi zodiing uam? Hih dik i hi diam, ahih keileh i theihlouhpi khat ngenngen i hi zodiing uam?

 

~ Sumthanlian Suantak | Nisim: 2020 kum Gamkha 8 ni (8th June 2020)

A KISIANGSAK THEI TUAM I OMKEI UH

 

I gamsung siatdan bang, ahih keileh ei mimalmalte; i siatgawpdan uh, i thumanlouhdan uh chihte i gen sek uhi. Tulai in Missions Tuailai 2020 saina a online sermon om zelte ah i siatdan uh hong kigen hi. Pathian thugente bang leng… i khelhna thu uh ahi bangbang a gen diing ahih chiang in kisuanglah deuh uh bang ka sak ton a om hi.

 

17.4.2020 ni khawng apan in Evan. Lianding Guite in i siatna leh khelhna thute uh ‘ahihi mah’ hon genkha fuh ka sa hi. Tuzan in Rev. Kamchinkhup in hon genkha nawn a, kipahhuai ka sa hi.

 

Laisiangthou a i muh Jawlnei Isai, Jeremiah leh adangdangte'n hangsantak a Israel mite siatdan a gen toihtoihdan un ei gam a Pathian thugente'n leng i siatdan uh a gen chiang un kisuanglah lou in hangsantak in hon gen zellai le uh chi mahmah ing.

 

I gam a se lua i chi uh. Hih leng a himah hi. Himahleh Pathian thugente zahna liantak zaw omlai saam hi. Tulai hun in i gam uah khelhna thugen Pathian sikhate vuakliam hiam Pathian thu ziak a thah a omkha om nailou un ka thei hi. Program khat omleh thuumna nei diing bang in Pathian nasemte kisam in kichial sek hi.

 

Hiai in hon etsak tuh Pathian deihdan zuizou kei mah le Amah launa kinei lai a, A vualzawlna leng kideih chiat tadihlai hi. Pathian thugente'n a gen diing dawl un hangsantak in, thuak hial a kuulleh leng, hon gen toihtoih ngam uh kipoimoh hikha diing hi.

 

I gam siatdan i gen chiang un uang lua chih omlou khop a khelhna a kibual i hita i chi uh. Himahleh sualna hihtute maitang a maituah (confront) Pastor, Upa, addg. kigen zak diing a omta hia? I siatnate uh toh kikhom a, guh dawk zen a gen diing mihangsan, thutak mai a taise lou Lamka khopi in kisam himaithei hi. Kisuanglah hetlou in gentou zel le’ng chihhuai lua hi.

 

I pastor, evangelist, addg. khelhna thu gen dia hong kipante moral support pia, dinpih, gum leh hasot diing gingtute'n i mohpuak uh hi in ka ngaihtuah hi. Hangsantak a hon genkhete i na dinpih louh chiang un amau aa di'n pangpathuai thei diing hi. Tua ziak in a gen uh hoih i sak chiang in khut a na beeng a, i tosawn a, kipahpih i hihdan i na latsak zel pen A min a thutak gen ngamte tuisik nou khat i piakna bang in ka ngaihtuah hi.

 

Pathian thugente'n a gen chiang un Laisiangthou ah kiik ni, Laisiangthou i damna ahi chih tan a gen sek uhi. Ka gen diing bang ua gen zoulou ka hi uh, chia mahni mohpuakna genna bel kinei banlou sek hi. Ka gen diing bangtak un ka genkha kei ua, leng ka gen zoukei ua ahi chih dante zak diing om khollou. A ngaikhetute khelhna kia zaakzaak dia om sek. A ngaikhetute tuh a khial leh chinlou mah kihi. Huchihlai in a gentute lam apan mohpuak zohlouhna ki-admit na tawm deuh a diam ka chi sek. Tuzan in Rev. Kamchinkhup in thugentute mohna leng a hon genkaikha cheuh a, hoih ka sa hi.

 

Hitler in Judate mihing nuai guk a thah i mohsak chiat uh ka gingta hi. Hilehle a teacher-pa kua'n a mohsa ngei a? Ke'n chu Hitler' sinsaktupa leng mohkha in ka ngaihtuah! I tate a siat uhleh nu-le-pate kihul thei diing hiam? Ka gingta kei.

 

Lamka mipite siatna ah sahkho makaite siang thei diing mah uhia? Ke'n chu amau leng mohsakhuai ka sa hi. A ziak bel siampu Eli' tate gitlouhna ah Pathian in siampu Eli ngei leng a tai-ek hi. Pastor-te, thugentute i mohsa ngei kholkei ua; a zu nenete, a gutate, tualthattute, poppy chiingte, chingpi kaapte, addg. i mohsa sek uh. Himahleh amaute tanchinhoih a keemtu leh vaaktu Pathian belampute i mohsa ngeikei uh! Kimohsatuah ni chihna lam hilou in hansan i suahthak poimoh ahi chi ut i hizaw hi.

 

Taihilhtu dia mohpuakna nei mite toh kisai in Romte:12:8 ah, 'Taihilhmi'n leng taihilh geihgeih heh...,' chi'n kigelh hi. Toupa'n gingtute hih dia hon deih leh mohpuakna hon piak a tuamtuam om chiat hive'n, A hon deihna leh lametna tan semsuah thei diing in Toupa'n i vek un hon ompih chiat hen aw.

 

~ Sumthanlian Suantak | 19/04/2020 (Published in DEW 26.4.2020 issue)

PA PATHIAN’ THUPINA, MUANHUAINA LEH GINOMNA

 

Zan (09.4.2020) nitak a Evan. Thangsuanpau' thugen a ka theihbeh khat - Pa Pathian’ thupina, muanhuaina leh ginomna ahi.

 

I Toupa Jesu Khrist in i khelhna pua a, sihpih hilhial a a omlai a, Jesu Khrist in ama' Pathianna zang a, a Pathianna bei taktak loupi a si, a ni thumni a huai Amah a om, a Pathianna mah zang a thounawn ka na sak gige ahi.

 

Toupa Jesu Khrist’ kipumpiakna a nak thupidan maw. Ei mihingte; duhamna, kihazatna leh kithupisakna ziak khawng a coup bang ahih keileh i hihtheihdan tuamtuam zang a thuneihna leh dinmun i kilaaksakdan leh kisuhsakdan maimai khawng i ngaihtuah mawkmawkleh Toupa Jesu Khrist in i khelhna a puaklai a, Pa Pathian in a nungngatsan hunte in a Pathianna taan taktak a na hi tel hi! Maizen tel lawmlawm!

 

Ei khawng dan a thuneihna kituh hitazen le uh; Pa Pathian in Jesu Khrist (Pathian hihna taan a, mihing khelhna tengteng a puaklai a, Pathian ahih louhlaitak a) kaithou nawnlou a, nidang a Jesu Khrist’ thuneihna tengteng Pa Pathian in kitan thei himaizen hi a! Huai tengteng ‘risk’ khawng leng poisa lou a Toupa Jesu Khrist mihing hong suak hitel hi!

 

A tapa Jesu Khrist in ka khelhna pua a, Khros a a kikhaikanglai in Pa Pathian in a nungngatsanlai khawng... Mihing hong hi, Jesu Khrist lungzin diingdan, a Pathianna tengteng suahkhia a, Pathian hi nawnlou thei leh i khelhna tengteng pua (meidil luut thei hita!) tan a mihing dinmun mahmah a A hong kiniamkhiak tel!!

 

Huai dinmun ah Pa Pathian in Jesu Khrist' hihna ngei teng pu nawn dia A kaihthoh khawng... Jesu Khrist ah huai mahni thu a thohnawn theihna om nawnlou hinapi a kaihthohnawndan khawng.... Pa Pathian nak muanhuai in a nak ginomdan maw!

 

Huchi khop a ginom leh muanhuai Pathian in kei bang hon it, leh kiniamkhiakna tawpkhawk toh ka thuak diing tengteng hong thuaksak Toupa Jesu Khrist. A nak thupi lua!

https://m.youtube.com/watch?v=iaUiehkROBU

 

~ Sumthanlian Suantak | 2020 kum Doutakha 10 ni (10.04.2020)

MIHINPIHTE SANG IN LIMLANG ITZOTE I HI UH

 

I Laisiangthou a i muh Joseph tangthu apan i muh theih ahihleh thutak ahih nakleh a ute siatna leh hoihlouhnate a im maimai kei a, a daih didepih kei hi. Tua naksang in a genkhe zel hi. Joseph hinkhua leh tangthu i theih chiat uh a gintakhuai hi. Joseph in mi kuahiamte' hehna diing hilehle thutak ahihman in a genkhe zelzel hi.

 

Huchi'n, a tomlam a gen in, kokhuk ah khiak in a om a, zuakmang in a omlai hi. Joseph in thutak a paai pen a na genkhe lou hileh a ute' huat a loh kholkei maithei hi. Kokhuk a khiak in leng a omkei mai diam maw.

 

Ahihleh Joseph bel thutuam chi lehang; a ute’ dinna apan en hi lehang a sanggampa uh iplahhuaitak zaw hi ngut diing hi. Joseph' ute bang in kingaihtuah zual zenzen lehang Joseph bang i loh dia? E'n leng amau hih bang geih in kokhuk ah i khe dia, i zuakmang thou diing un ka ngaihtuah hi.

 

Facebook ah fake account a bawl theih hi. WhatsApp ah ahihleh bel i phone number pansan a account kibawl ahihman in fake account om thei khollou in i thei hi. Thutak leh thuzuau nasatak in i kaapkhia ua, tuzaan in kingaihtuah lehang a Joseph in i pangkha hia, a unaute in?

 

I inn uah limlang i nei chiat diing un ka gingta hi. Limlang in zuau a gen ngeikei hi. Ahi bangbang a hon taaklang a, achang in i deihlouh i maai a chivom leh a geep, ban ah meimapawn bang a hon musak hi. Bangteng hileh i kilatdan kilawm lou i sakte limlang i ngoh ngeikei a, ei' hoihlouh mah ahi bangbang a hong dawk a ngai in i pom thei vanglak uhi.

 

I hihna hon laktu hinna neilou limlang i zuun ua, i hahsiangthou zel uhi. Ahi a, poi i sak bang a poisa thei leh i kipah bang a kipaak thei mihing dangte tung ah bel limlang i pom bang in i pom theikei a, i huatlohzo sek maimah uhi.

 

~ Sumthanlian Suantak | 2019 kum Noukha 22 ni (22.11.2019)

LAU DIING I HIAM?

 

Naupanlai in khua a hong mial chiang in khomial kilau sek hi. Khomial lau kichi mahlehang i lauh pentak kigenkhe theilou in lau, dipkua leh mangbang kihi pen hi. Khomial nuai/kawm ah banghiam a vom lelu khawng om dia suangtuahna in hon buaisak a, ei kia in inn-nuai a luut diing ahih keileh ei kia a pawtkhiak diing leng kingam lou hi. Adiak in khosung a misi leh sihsia a si khawng a om chiang diakdiak in kipatau a, banghiam hong pai om diing leh thilging bangbang hiam khawng hong om di’n gintakna kinei hi.

 

Huchihlai in upalamte bel lungmuangtak in om thei uhi. Nungak leh tangval, nupi leh papite bang hangsan uh kisa mahmah hi. Khomial laulou in, nitak chiang bang in leng amau kia a daileng ngam, pawt ngam uh chi in ki-eng thei mahmah hi. I khut a hon let ua, a hon kaih nak uleh a pai nana uah kipai ngam zel hi. I lauh pen bangmah hilou a na hi a, hon lentupa i muanna ziak in lungmuangtak in ki-om thei hi. Ei a kimuanna omlou leh muan diing, belh diing i neihlouh ziak a beidong a na kihidan ahi.

 

Lauhna kichi a omsa banghiam ziak a hong piang ahih sang mah in i muh ngeilouh leh i tuahkhak ngeilouh mi’ gen a i zaakkhak leh thil khat om dia i gintakna, i suangtuahna ziak khawng a hong piang thei ahi. I lauh pen om taktak hikeileh leng e’n gingta lua i hihman in suntanglai nasan in kho-ul kaai thengthuung zen in kantha kawm ah kikhum theih a na hidan hi. Hon lausak diing in banghiam i lauh pen a om ngai teitei lou a; a lautu, ei pen in i gintak nakleh i kimuanngamna zulmang thei mai hi.

 

I hong khanglian a, piching i hong hi a; neulai a i lauh mahmah thilte bang lauhhuai lou ahihdan khawng i hon theisuah hi. Theihna in lauhna hawlmang thei ahihdan chiang mahmah hi. Lauhna kichi polam a om thilte ziak sang mah in ei’ sunglam - i sisan chauh ziak bang, i ngaihtuahna ginat louh ziak bang, ahih keileh i thuzakte, a dik-le-diklouh thutuam hileh, tuate ziak khawng in om sek hi. I ngaihtuah kikleh i thil lauhte - amah a lauhhuai taktak leng hi khollou, i suangtuahna a i bawlkhiak tam zodiing in ka gingta hi.

 

Nidanglai a i pi-le-pute un a na lauh mahmah uh dawi-le-kaute ahi. A lauh ziak un biak leng a na bia uhi. Amau dinmun a ding dan a i kingaihtuahleh lauhhuai mah a na hi eive. A ziak bel Pathian hing neiloute aa diing in mahni i kihum kei ngalleh hon hum diing, hon veeng diing kuamah dang om hetlou hi. Dawi-le-kaute bel mihing thahatna a zoh diing vual hilou uhi. Kha tuh sa sang in a hatzo himhim hi. Kha in a ngapte sa aa diing in haksa leh zohvual hi veklou ahihdan Toupa Jesu mahmah in a na gen hi (Matt 26:41).

 

Pathian’ itna, Jesu Khrist’ hon tatna thu, Tangthupha i zon theihlouhlai un i gam uah puaklut in a hong om a, i nak hamphatdan mai uh! Tangthupha in i gam uah khanlohna a hon tun a, biak diing a chin leh phu omsun Pathian tak ahihdan a hon theihsak lailai in salam ah khantouhna nasatak a hon tun hi. Tangthupha i gamsung ua puaklut a om a kipan i khosakdan, i tawndan leh thil bangkim phial a hon kheksak a, hampha hi na lawmlawm hang e! Suangmantam khuuk sang a leng manphazaw ahi, hiai Tangthupha!

 

Thil himhim a zatna diingdan a i zatkhak louh chiang un thil manpha bangmah a omkei hi. Manpha ahih sangsik in hamsia leh sihna a suak zaw hi. Pathian thu leng ahi thou hi. A gingta loute aa diing in siamlouhtanna a hi pah hi (Johan 3:18). Pathian itna a na saangte’n a hindan luite uh tawpsan in Khristian a na suak ua; haksatnate a na tuak mahle uh tawpkik lou in, ginna a na lenkip paisuak uhi. Tua bang ahihlai in a kilimsiamte’n bel a kidaihzai tangtawn hinna ah tankhak neilou uhi!

 

Tapa Jesu Khrist neite sung ah Khasiangthou teeng hi. Gingtute’n khalam hinna neita mahle uh salam pumpi a tuam hilai veve ahihman un bah-le-chau a om thei tuh hilai uhi. Gingtute sung a teeng Khasiangthou i mit in mu theikei mahle’ng hon hihhattu ahi. Hiai Khasiangthou, gingtute kiang a piak a om pen dawi-le-kaute’n a zohlouh Pathian hing ahi! Tua ziak in Pathian toh i panleh hon zou thei diing omlou hi. Abang-abang hileh lei a om den dia siam kihi lou himhim hi.

 

Nikum tawpkuan a huangvulh gantate tung a thiltung tuamtuamte toh kisai in dawnna lungtunhuaitak i mukei hi. Khovel in hiai bangte’ dawnna piak sawm mahleh a pe theikei hi. Tua bang ahih nung, i kiim-le-kiang a thiltungte ziak in Pathian’ tate i mangbat diing uh ahi diam? Joseph kiang a mang lehkhiak theihna Pathian in A na piak bang in poimoh A sakleh i kiim-le-kiang a thiltungsate leh hong tunglai diingte’ hilhchetna eite kiang ah leng hon pe thei hi.

 

Khovel a thiltung diingte toh kisai in mihingte theih dia Pathian in A phal tan A om a, mihingte theihlouh dia bilhkhum a A koih pawl leng om hi. Tua ziak in a dawnna ah i buaikei diing uh. Khovel khelhna a piluttu nuai zinmang’ thilhihtheihna sang a thilhihtheizaw Pathian ahi. Huai Pathian (Khasiangthou) piak a i om nung a i kiim-le-paam a thiltung tuamtuamte a i mangbat sekna, i lauhthawn seknate khawng i ngaihtuahleh ei a om Pathian’ thilhihtheihna i theihlouh ziak hi sek hi.

 

Panpihtu neilou bang a kingai in mangbangtak in i omkha sek hi. Hon neitu in A hon piak, ei’ sung a om Khasiangthou nei beubuau hinapi in deldeptak bang a kingai in i omkha sek uhi. Amah, i sung a om pen gamtangsak diing in Pathian toh i kizopna i theihchet zohlouh ziak in i mangbangkha pahpah uhi. Ei kia pang diing a zaw thil hih theilou leh hatlou mah i hi. Himahleh, eite hon hihhatpa Amah Jesu Khrist ah hatna nei in thilhihtheitak i hizaw uhi (Phil 4:13).

 

~ Sumthanlian Suantak | Gamkha 11 (11.6.2019)

SAPTUAM SUNG AH TUISIANG I POIMOHDAN

 

✔ 1. Baptisma piakna diing in tuisiang i poimoh uh.

✔ 2. Khristmas hunpite leh vai tuamtuam ah tuisiang i poimoh uh.

✔ 3. Sacrament hawmna noute silna diing in tuisiang i poimoh uh.

✔ 4. Pulpit a ding a Pathian' thutak gentu in dawn diing tuisiang a poimoh hi.

✔ 5. Tuisiang tellou in biakna program zat a haksa mahmah hi.

 

Hiai tuite i laakna dik henla, i poimoh zah tuisiang mu thei gige lehang a uthuai ngei. Diktak a i muh leh kholkhiak tuisiang vualzawl a donhuaidan maw!

 

~ Sumthanlian Suantak | 2019 Gamkha ni 7 (07.6.2019)

SALAM I TAKSAPTE DAWNNA PATHIAN LEH LAISIANGTHOU AH I MU THEI DIAM?

 

Bukim lou i hihdan i haihkei hi. I taksap ziak a Pathian naih diing kihi masa lou hi. A hon bawltu Amah ahihman in A kiang i zot diing a hihim hi. Amah aa diing mawng a siam lah i hi ngal a. A vualzawlna dong a i kitheih louhlai in leng A kiang apan taimang zou diing vual kihi lou hi. Hon khotuahtu leh tangtawn gam i zot hun chiang a leng i poimoh semsem diing Amah ahi. Khovel a lam-etna nei nawnlou i kichih nung a leng i taaina ahi. Amah toh kikhen den a i tangtawn hun zat diing i ngamkei hi!

 

Tua bangzah a i muan i Pathian in dawn diing tuisiang a hon pe thei diam? Gamdai ah Israel-te aa diing a suangpi a kipan tui pepa mah tuni a eite biak i Pathian ahi. Amah maw zan, tuni leh tangtawn a dang ngeilou diing Pathian eive. Israel-te dawn diing tui a piak bangbang in ei aa diing leng hon itlou diing eive. Ahihleh dawn diing tui duh in A kiang ah i taita uhiam? I poimoh zah hon pe thei diing in i gingta taktak ngam hia? Bangziak a tuisiang tasam i hita ua?

 

Khristian piangthak i hih nung in leng salam tui i duh theihna beilou hi. Tui duh a i dangtak ziak un muh theih dandan, adik-diklou chih omlou in laak theih dandan in i la zel mai uhi. Lungsim a siamlouh kitankawm pipi mah in tui muh theihna ahih peuhleh chi in kilungkimsakkawm in i la zel a, i utdan zaw a hi masa kei hial hi. I utlouhdan a i gamtat a ngaih mai tuh gen thei hi na lawmlawm hang e maw! (Rom 7:15-20) Hiai salam tui taksapna apan kua’n hon suaktasak thei diing hiam?

 

Gamsung siatna ziak in sai-ip puan silh in i na om ngeita uhi. Sual dou in naktak in i na pangta uhi. Tua bang ahihlai in tuisiang dawn diing ngen in A kiang tung diing in i kapkhe ngeita uhiam? Israel-te Pathian in Aigupta saltanna apan a pikhiak ma in nakpi in a na kap ua, a kahna uh Pathian kiang a na tung hi (Exodas 3:9). Hiai bang hun haksa a i dinlai un kapkhiak zoihzoih poimoh hi'n i thei uhia? A dawnna i biak Pathian leh Laisiangthou ah omlou hiam!

 

~ Sumthanlian Suantak | 2019 Gamkha 6 (06.06.2019)

MINAUTANG LEH TUINEK KIZOPNA

 

Exodus 17:1-7 i simleh dangtak luat ziak in Israel mite leh a heutupa uh Mosi kaal ah thil nuamloupi tung thei hial ahihdan kimu hi.

 

✔1. Israel mite'n a heutupa uh Mosi a kinakpih uh (t.2).

✔2. Dangtak ziak in Israel mite'n Pathian a ze-etkha zezen uh (t.2, 7).

✔3. Israel mite a heutupa uh Mosi tung ah a phun uh (t.3).

✔4. Israel mite'n a heutupa uh Mosi suang a deeng diing in a kisa uh (t.4).

 

Heutu leh mipi kaal ah thubuai a hong piangkei diing chi ngam kua hiam? Bill-3 ziak in heutute inn banhal in a om hial! Anuam-ahaksa thuakkhawm Mosi leh a mipite kaal ah kithahna tanpha tung thei diing a bang hial hi!

 

Hiai a ka gelhte Lamka zaang a teeng nam tuamtuamte - zaatbing leh chi-le-nam en a neuchik a gen hilou ahi. Dangtak thei minautang leh tuinek kaal thu a hizaw. A hunlai a panlak poimoh mahmah eive maw.

~ Sumthanlian Suantak | 04.06.2019

KA DANG A TAAK!

 

Van leh lei siamtu Toupa Jesu Khrist in khros tung ah, “ka dang a taak,” chi hi (John 19:28-29). Dangtakna kichi Pathian hilhial nasan in leng a tuahkhak thil ahi. Nungchiang in siamlouhtansak a omte’ tangtawn kahla diing hilai hi! Tua bang a i omkhak diing i kiphal mahmah kei hi.

 

Aigupta saltanna apan Pathian in Israel-te a hunkhia hi. Gamdai ah suakta kisa a a pailai un tui duh in a hong kikoukhia uhi. Biakna lam leh salam a a makaipa uh Mosi aa diing in lungkhamhuai mahmah diing in ka gingta hi. Toupa kiang ah Mosi a kapkhia hi (Exodus 17:1-7).

 

Pathian thu a zak bangbang in Mosi in a chiang in suangpi a saatleh dawn diing tui a hong pawt hi. Pathian’ vualzawlna tuisiang Israel-te’n a dawnlai un a heutupa uh Mosi' kampau ah Pathian a thangpai hi. A lutkhak louh diing gamchiam Mosi in a galmuh thei phet lel hi!

 

Taksap a neih chiang un Pathian in Israel-te’ poimohte a pe zel a, tua diing in vanzat in miphaakte bang, kumpite bang, mihaatte bang, biakna leh salam a a makaite uh bang vanzat in A zang zel hi. Israel’ mipite mohpuak bel a dangtakna uh zaak theih diing a kikoukhiak ahi.

 

Ahihleh, tu hun in eite leng Israel-te bang in i dang uh a taak saam hia? Dangtak thoihdamna diing in saat diing suangpi koi ah i nei uale? Suangpi hon saatsak diing biakna lam leh salam makai diktak i nei diam? Pathian apan tui saatpawt diing in kamsangmi Pathian’ aw za thei i om diing uam?

 

I poimoh khalam an in Toupa’n a hon na vaakta a, i gam uah revival a na tung zelzel hi. Salam a i poimoh dawn diing tuisiang leng hon pe ngei diing in ka gingta hi. Tua diing in i dangtakna A kiang tung diing in aw i suahkhiak poimoh hilou hiam?

 

Ka dang a taak, Toupa!

 

~ Sumthanlian Suantak | 04.06.2019

LENNA TICKET ZUAKSAWN, LEISAWN CHIHTE CHIINGKEI NI

Kum tampi paita in ticket laaksa zuaksawn kichi dankalhna ahihlam theiloupi in, khelhna a leng ngailou in zautak in a na kichiingkha zelzel hi. Laakkholhsa a i neih banghiam ziak a zin theilou thak dia i hong omkha zaw, cancel man a tam toh muhkik diing tamlou ahihman in i laakna zah sang a tawmzaw bang in leng a deihte kiang ah i zuaksawnleh naalou deuh in kingai hi.

 

Hon leisawntu bang in leng kintak a ticket a laak diingleh lenna ticket man tam lua ahihman in original ticket man ban ah Rs.2000-3000/- behlap in leng la ngam om mahmah hi.

 

Kipanpihtuahnadan a ngai in i na zuaksawn-leisawnkha zelzel uhi. A zuaktu leh a leitu leng kipak tuaktuak. Kipahthu bang kigen zomah.

 

Ahi a, i lak uah hiai dan mimal min a laaksa midang' zat dia zuaksawn daan in phallou ahi chih theilou i omlai zenzen diam ah... I naute a dia min khek a, ei' taang a amau paisak chih natan daan in phallou a na hi. Tua dante matkhiak hi zenzenleh impersonation leh bangbang hiam a case neihna suak thei hi.

 

Tua ziak in hiai dan a ticket i laaksa zuaksawn hiam, mi khat min a kilasa leisawn chihte chiinglou thei diing in kisa ni uh maw.

 

Sumthanlian Suantak | 27.5.2019

VUALZAWLNA LEH HAMSIA OM TUAKTUAK

 

A limlak kilakhia... [It looks like pepper being kept for drying. Zoom it and see it. It's people at trissur pooram festival]

Hiai lim i etleh mihingte alompi a omkhawm in, tampi bang lehang leng etdan tuamtuam in et thei hi maw. Tangtelhon, lung lompi, thanhon bang lel kihi eive maw.

 

Electronic gadgets hoihpen tawi in, nalhtak in kizeem lehang leng miksihon omkhawm bang lel kihi eive maw.

 

Nuntom pakpalh bang lel i hinna sawtlou kaalsung lel aa diing hi. Khovel a sawtlou i hinsung tangtawn a gimgentheihna thuakna diing lel a khial a piang a, khialsa mah a khin diing i hiam?

 

Ahih keileh tangtawn a vansin vaakna bang a taang a nuamsa tawntung dia khialsa a piang, Jesu Khrist' sisan a silsiangsakna teel zodiing i hiam?

 

Deihtelna piak a i om, i teelkhelhleh chikmah chiang a khelkik theih nawnlouh diing, bilhkhum a om den diing hi tel hi. I ma uah vualzawlna leh hamsia a om tuaktuak hi.

 

Sumthanlian Suantak | May 15 at 2:18 PM ·2019

PATHIAN' HON ITNA

 

Ginna a i pa uh chih a om Abraham ahi. Hun sawtpi nung in tapa hon nei uhi. Tapa deih lua zaw ahi diing ua, hihdan diing ngaihtuah in Ismael bang a neikha uhi. Dik-le-tang a neihlouh nana na tuh tuithawl posak in khakkhiak a ngai hi! Hiai thupukna a laak diing in haksa a sa mahmah diing hi. Ahi a, a nung a ze-etna a tuah diing nasa zolai hi.

 

Ama' aa taktak a sim, Isaac a hong khanglian a, a pa toh kithoihna bang hon laankhawm uhi. Ismael toh kisai a thupukna a na laaktaak thil haksa mahmah ahi diing. Himahleh a nung a a tapa Isaac a sapna a don toh bel tehpihtham a hikei hial hi.

 

Ismael ahihleh suahtaaksak ahihthoh a, Isaac bel a ittak, a zi toh a ta neihsun uh thah diing, kithoihna a lat diing hi tel hi! Huchi in a tapa tonpih in Pathian kiang a kithoih diing in a pawtkhiakpih hi. A hih diing theisa a pawtkhia ahi, kithoihna a a tapa laan diing in! Maitam tung ah a tapa hon sial a, a khut-le-khete a heensak hi.

 

Hiai tan ah a beikei a, a temta a hon liik hi. Laisiangthou ah hiai bang ze-etna a kimu ngeikei hi. A tapa thah ngai taktak diing dinmun a ding ahihdan a kithei hi. Hehnemtu diing midang kuahiam' tanchin apan zil diing khat leng om nailoulai hi. Huai tan in leng a taise kei hial a, a temta vaanlam ah a liiktou taktak hi. A tapa lah kipekkhe thei diing a hikei a, amai ma a maitam ah a lum dildel hi. Aw Abraham, Isaac tung ah khut na kha taktak tel dia hiam?

 

Leitung a lian mahmah hi. Khovel i chih a thupidan mai! Leitung leh sol tampi, nisa toh a om hi. Huchi bang in aksi leh a kimvel uah sol tampi a om sihseuh uhi. Sim senglouh aksi tampi kigawm in galaxy bawl hi. Galaxy mah leng sim senglouh a omlai hi. Hiai galaxy dandan ngen lompi (colony) sim senglouh a omlai hi, mihing in a phawkphakna tan ah.

 

A om taktak mihingte' suikhiak louh lompi dang tampi a omlai mohkei diing e. Huai zah a tam thilsiamte bawltu Pathian ahi a, Pathian' tapa tang neihsun Jesu Khrist ahi. Pathian in A tapa ei' khelhna man pe dia a hon sawl in huai aksi leh sol tampite lak ah leitung sese a thilsiam om mihingte a itna liandiak leh lianpen ahihdan taklang hi.

 

Huchi in thilhihtheihna bukim tawi, vanglianpen hilai, a' hihna lamdang apan hong kihih-awngthawl in gan an piakna ah a hong piang hi! Mihingte' khutnuai ah piak in a om a, mihingte nasan in a thuak zohlouh zahdong a haksatna namkim a hong thuak keukeu hi.

 

Aw Abraham, na tapa tung ah khut na kha taktak tel dia hiam?... Khotuahtu Pathian in Isaac sik a lat diing belam a pia hi. Pathian i chih lungtang enchianpa ahi a, atak a kithoihna dia Isaac tung a khut a khaak ma in kithoihna laan khin bang in Pathian in a pom hi.

 

Abraham bangloutak in Amah-le-mah tung nana na ah lungtang etchetna tan ah a beisak kei hi. Khros tung ah Jesu Khrist khaikang in a om hilhial tel hi! Isaac khut-le-khe hensak a tang theilou dia maitam a sial a a om bangbang in Jesu Khrist leng taang theilou diing in Khros ah kilhbelh in om hi.

 

Tua dinmun a a omlai in Isaac khahzan in a om hi. Jesu Khrist ahihleh khahzan in a omkei a, a taktak a sihna tuaksak diing in kilhden in a om hi. Thupina lallukhu hilou in, simmohna leh natna ling lukhu khuksak in a om hi. Isaac bang a pawtsak in a omkei a, maitam, huai Khros tung ngei ah eite' khelhna man pia in a hinna a khahta hi!

 

Itna lamdang, ka tatna man, ka khelhna man a tam tel maw. Tua tatna man Toupa Jesu Khrist in a hon piaksak ziak in hotdam a om ka hita... Pathian' itna lian in sang hi. Kei bang leltak hotdam in ka om tel! Halleluiah!!

 

Sumthanlian Suantak | April 19 .2019