DELHI ZOOLOGICAL PARK
ZAAN, 6th November 2014, Guru Nanak' Birthday ziak a office suty. Inkiang apan UPSC, Shahjahan Road tan DTC Bus Route No.623 a tuang. Huapan Mobile phone a Google map pansan a Purana Quila kiangchin a om Delhi National Zoological Park i.e., Delhi Zoo, tan khe a pai. Ticket Adult kha Rs.40/- hi a, a sung a va lut. Lungluthuai hunkhop va mu. Delhi Zoo kha tulai in (16th October to 31st March sung) 9:00am apan 4:00pm tan kihong hi a, Ziltawpni leh National Holiday teng a kikhakdan ahi. Piching-te lutman Rs.40/- ahi a, Naupangte' a Rs.20/- ahi.
1st November 1959 in Mr Punjab Rao Deshmukh, Hon'ble Minister of the Government of India in a honna nei hi. A sung ah ganhing tampi et ding om a, asung lianpi ahih ziak in a vek a va etzoh hilou hi. A sung ah ganhing chi tuamtuam: Rhinoceros, Giraffe, Lion, Tiger, Dear, Stag, Monkey, Langur, Crocodile, Hyena, Reptile, birds, etc. et ding tampi om hi. Vasa lunglutte ading in Bird house a tuam in om a, Guul en utte a ding in Reptile house tuam om hi.
A liante a ding in a lungluthuai mahmah lai in naupangte kilawp petmah uh hi'n ka thei hi. A vangkim in lunglut luatziak a, "Papa!.." chia kikou AW zaak ding tam mahmah hi. Tuma zek a White tiger 'Vijay' kichi, mi keilumpen mah in entute mit lapen ade aw ka chi.
Khe a vaksawt peihloute a ding in a sung ah aman piak a tuantheihna gari om hi. Tuisiang a thawn a dawn ding leng mun bangzah hiamtak ah kikoih hi. Gilkial dangtakte a ding in a sung ah nektheih chi tuamtuam lei ding leng om hi. Inkuan a vak-halhna ding a mun nuam, thoveng leh hoihtak ahi.
(http://nzpnewdelhi.gov.in/index.htm)
PURANA QUILA
Delhi Zoo kiang chin a om ahihtoh phaak ngalngal ut in Purana Quila ah ka luttou nawn a, a-building lui mahmahta lah tou chi mahmahlai lianpi ana hi a, a sung ah Museum om sawn hi. A sung ah loupa hing dipdip in tawldamhuai petmah hi. Akop-kop a tukhawm numei leh pasal om tiltel geuh ua, ki-itna thu khong mah gen khawm uh hi'n ka koih hi. Museum sung i lutleh thil lui kipholhsuah kum tampi paisa a van kizang leh Arts&Craft leng muhding tampi om hi. Hinna kichi hichia paitou zarzar mai ding hilou a, ei le sithei a kihihdan museum sung a om thilte'n hon theisak mahmah hi.
History theihbeh nuamte a ding in leng vehtaak ahi a, Delhi Sultanate Period, Mughal Period, Rajput Period leh Pre-historic lai a thil tuamtuam et ding leng om hi. Tate toh hoh a thil tampi va ziltheihna mun ahi.
Purana Quila sung a lutman Rs.5/- chauh ahi a, Museum sung a lutman a tuam omsawn a Rs.5/- mah ahi. Friday leh National Holiday teng a kikhak ahi.
(http://www.delhitourism.gov.in/delhitourism/tourist_place/purana_quila.jsp)
Huchia theihlouh kaal in hun sawtpi ana pailiam man a, a-kong ah DTC Bus Route No.419 a hong taai a, Moolchand tan ka pai hi. Huapan khe in intan ka pai tung hi. Vaakna tawlsim in ann ka nepah hi. Kisil siang a tawldam deuh e, chih in Munirka a lawm Thangkhanlian Guite-te' inn ah va pawtleh Lawm Goupi-te inkuan leng a na om ua; Teach zodawn toh kisai thuvantang sawtsim kihoulim uhi. Singpi limdeuh mai Lian' zi - Nemsiam in hon pia hi. Zaan le hong sawttaak toh inlum ka zuan nawn hi. Bus 623 hong pai zoklou ahihman in hong taai masa Bus 764 in Hauz Khas Metro lam ka manohzaw a, AIIMS tan metro a pai in; huapan khe in intan ka paitung hi. Huchia Nikhat hun chu kizangbei hi mai dan eive.
