I Nam Damna Ding

🌱Tulel a haksatna leh buaina i tuahte'n ngaihtuahna a hon khoih mahmah a, tuate i geellai in tuate mah i buaina khukpi hi zawlou in i sung chidam louhnate kilatna hi'n ka koih hi. Bill 3-te'n i nam sung a kituah louhna i neihte chiantak in taklang hi.

🌱Ei Paite namte'n innpi a i neih PNC ahi a, Lamka sungbang ah issue a hong om chiang in zaatdang tuamtuamte interest ngaihven selou in thutawp gen thei in i na om linlen uhi. Ahi a, tuchiang inbel kisuneu in PTC chi'n innpi min kheek in ana omta hi. Ahi a, namsung a Pa dinmun a ding ahihlai in a' mi-le-sa Salphate luang vuikhiat ahihma bang in JACAATB apan kizuukkik maimah a om in, i namsung adia Pa a sim hinapi a tate luang ah a khut silsiang bangmai in om hiuhiau thei bang hi.

🌱Siatni-phatni a i kingakna pawlpi YPA kichi hi. Adiak in dahni leh vangtahna i tuah hun in i taksapte awng hon huksak a, siatni-phatni in giautau lou in ki-om thei hi. Salphate tungtang bang ah hoi hetlou a dingkip giugeu in om a, i namsung adia khuam muanhuai mahmah hi gige lai hi. Tutung a Lamzang thiltungte bang i etchiang in ngaihtuahna hon khoih mahmah bel YPA unit Lamzang ah omlou ana hi-a, YPA intekpan lou hileh i mi-le-sa haksatna tuakte ana enkaai taktak ding omlou maimah bang hi. Zomi Human Rights Foundation lah hiaihun in kampau hetlou maimah mawk hi.

🌱Siamsinna lam a khuam muanhuai mahmah Siamsinpawlpi kinei hi. Tu tantan in Salphate luang tungtang bang ahle minhoih dawk ding deihna om hetlou in a poimoh bangbang ah taai in JACAATB adi'n ana pang den uhi. March ni 7 nitak bang in SSPP heutute mah Lamka Damdawi Inn ah gim-le-tawl khawksa lou in pang uhi.

🌱Insung chidamna ding in pa in 'Pa' dinmun a adin ngam ngai hi. A mohpuakna a ngaihneu theihlouh ahi. Huchi'n Pa in ma kaai a; Tuailaite, naupangte leh nute'n papen a kithuahpih det chiang un inkuan chidam in navaak hi. Ei Paite namsung i etchiang in Insung pa, Tuailai leh Tate meeting khawmna ua thupukna bang thupi bawllou a Papen om ahi chi'n tuailaite ngohna tuma bang in a langtang in taklat in om hial hi.

🌱Tuabang ahihlai in Insung nupen neilou bang in i om nilouh ua, tu in ATWU in a tate uh suun in thumna khawllou in nei den ua, tuabang a haksa leh lauhhuai hunte bang ale tate luang genfel a a-om ding kaal ngak ngiungeu mai uhi. Ahi a, nu dinmun a ding ahihdan uh bang pom taktak utlou kibang simzel hi.

🌱Insung a i kiknawn a, responsibility la ngam a ngaihdan ki-accomodate tuah a i pankhawm theih uh i Nam damna ding in poimoh petmah hi. Zomi a i kikaihkhop hoihlou chihna hikei mahleh tutung bang ah i Zomi pihte hong Intekpan ngellou bang maimah a, kihuizek mahle a poimoh na om in kilang hi. Ei tribe sung a fel chiang in a Zomi ah contribution thupizaw kinei thei ding in gintakhuai hi.

(Posted in Facebook on 2017 March 8 )