KINAWKNA LEH KIDAALNATE TAWPSANTA NI

 

Kinangtuah, kidaaltuah leh kinengniam a omlou in pankhawmdan, dialdial a khosakdan chihte sin thak ni uh maw. A ngentu, a sualtu leh a saitu kua hitaleh i vek ua adia hoihte ah kithuap a kipahpihdan sin ni uh maw.

 

Hun paisa in Zogam (India, Burma leh Bangladesh) gawm a bawlkhiak i na tum in, i kidaal kei ua, hoih i sa chiat uh a bang.

 

A zoh in Union Territory deih a hong om a, phamta pu E. Vungkholian-te hunlai in phualpi solkal a uliante bang a va mu uhi. Lamzang zel bang a kilang i saklai in i kithat maimah uhi.

 

A nunglam in 6th Schedule ngetna a paizom zel a, ATWU leh pawl tuamtuam in gim-le-tawl khawksa lou in i na sual ua, himahleh i kidaal zel uhi! Blank fire bang i kibawlkhum tel uhi!

 

Huchi ahih nung in tu in...

 

i) Gam khat, India, Burma leh Bangladesh gawm a ngetna thu daai a bangta hi.

 

ii) Separate State, Autonomous Tribal/Hill State thu leng daai a bangta hi. Article 244A genphaak ahita kei hi.

 

iii) Union Territory thu leng tangkou diing i om nawnkei uhi. Mangta!!!

 

iv) Zoland Territorial Council (ZTC) ngen i kichi nawn ua, hiai pen State, UT leng a hisii kei hi. Ahihleh ZTC kichi bang hita diing? Indian Constitution nuai a SIXTH SCHEDULE ahih keileh bang hi diing? Hiai ZTC i demand uh a tawpna ahi diam? A hun in hon hilh diing hi.

 

A maphutu/makaitu a i pankhak louh ziak peuh in kilamdaal/kinang nawn mahmah kei ni. I muhleh i hamphatpih vek diing ua, i muhkei uhlehle i tuah uh a kibang diing hi.

 

Critique i welcome nopleh i kipahpih dia, i welcome theihkeileh i hehthoh diing hi.

 

Vision hoihtak nei hi lehang i kilamdaal kei diing ua, i kithuap diing uhi. Vision hoihtak nei hi lehang i demand uh hiai zahvei i kheek kholkei diing uh.

 

'Pasal sagih na nei a, tua na neih pen leng na pasal a hikei,' chih ei adia gelh ahi kei diing kua'n i chi ngam ua...

 

~ Sumthanlian Suantak | 2019 kum Noukha 23 ni (23.11.2019)