LANVA LUI

Lamka zaang a tengte' tuineek a kingaknapen LANVA LUI ahi. Tui hong kan khong ding lauhthawnghuai hi veh aw. January 4, 2014 hipan a, kangphial hita! Maban a March kha khong chiang in bang a chi phet diam aw...

Nidang a zaw hiai luitui kingakna taak mahmah hive'n. A kuang dimdim in luangsek a, vuahtui luanhun bang a akiim a teengte gam nawk in, a inn uh chimse phialkhop a alutlai hunte bang zuau khong hileh kilawm zezenta.

Ngasa bang tam petmah. School khawlchiang bang a ngasa beng khong a va kikuansek. Tuitha luui lah gamla deuh ahihchia a neute va kitung zou khollou inchin, huailai khong a naupangte adi'n spot nuamtak hi a, a luui a va kibual khalou ki-omlou phial ding hi veh aw. Kitui luluut in luitui valhkhak chang bang om in, mitsan geelgual leh chiteng puang phephut zen a aamtak a i va kisil lai hunte khong.

Khekol tengteng suahvek in vuaktang ngen in kisil pangpang geuh; kizum khollou zomah! Kisil zohchia a kiang a vahaai buan kisawk, buan sapsap dia a quality hoih petmah. Tap zuutna ding khong a puakchaang bangle om. A paam a bigaai bang le zongkawm zel zomah. A luui suang hoih taktakte kinawtna ding khong a sakhau khong a kikuahzel. Lunglen a huaitel, huailai!

Tangval thahaatte adi'n a suang liante tomkhawm a, seekkham in sum naak hoihtak hi a, a neute'n le suang neuzawte seekkham a pocket money ding muhtheihna ana hi. Piaunel bangle quality hoihlua hikei mahleh a na laakna uh hive'n. Tu'n zaw suang lian le muh ding a vaangta. Luui khiaklahhuai mahmah ahi chia gengen ding zaw ahi ta ve...

(Photo as on 04/01/2014, 10:30am, near Joshua Camp lui kianglak)

i

Bang I Chikep Dia.... The Choice Is Ours.

A khutte uh vuai in a ngaihtuahnate uh mawkgawpta mahleh...

A duh-le-deihte uh tuam in khangthakte duh-leh-deihte toh kigamlata mahleh...

A utdante uleh a thanopna lamte uh kidangta mahleh...

A khozaakna uh nidang banglou in a muhtheihna mitte uh bangle chiim nawnkei mahleh...

Nidang bang in hon deihsakna leh itna uh kilatna in nekding alim-a'al, 'CHIKHUM' hon puak zou nawnkei mahle uh...

Huchi'n le ka/i' Pi, PU ahihna uh kiam tuanlou a, nidang a hon itna leh deihsaknate uh suahzou nawnkei mahle uh a lungsim kawm ua a sia-le-pha theihna uh kidanglou eive. (Khenkhat bel a lungsim uh mansuah in hon thei nawnlou bangle ahi kha na dia...)

Hundang teng sang in HIAI hun ahi i itna i piakthuk sam hun ding. Hiai hun ahi i it taktaklam a kilat hun ding.

Upa lamte i kepkhak theih bang HAMPHATNA dan in ngai ni, mohpuakna/tunggikna dan in ngaihtuah mahmah kei ni. Tunggikna dan a i ngaih khakleh a keemte'n kining dia, amau mah inle nuamsa theilou ding uh. Nidang a a' ut bangbang ua a taakna, alim-a'al a nekna uh, a' lamsa uh insung ngei ah mikhual bang kisa mai ding uh eive. Tua a khut hamsim i sakte a i maai khong hon na phiat siangsak ua, a puan uh se nimnem i sakte bangbang a silhlai uh eive naupang neu i hihlai a i va bohboh lai a asilhte uh.

I zun-leh ek hon siaksak ua, zaan hun a i ihmut theihlouh lai a nu-le-pa kiang saang mah a pi-le-pu kiang lumzaw i sak hun bangle ana om tham ahi. Nu-le-pa'n hon na thuhilh chiang bang un hon gupziak ua a na ki-ipp hunte uh bang. Amau lehkha theilou himahleh a tute midangte bang a lehkha siam a hong hihding uh deih mahmah a nungzaang ua hon na pua in school a hong khaklai hunte uh. Khosia-vuahzu nuai a niliap khu a ahong dawnlai hunte. Ahihkeileh khovotpi nuai a school kaai i tawp chiang a Kanpuak hon kansak-kanpih lai hunte uh... Gen senglouh a hon hihsakte uh mangngilh mai theih ahikei.

Sunhun-zanhun a khanvual pawl zou nawnlou bang in inn ah kikhumdenta mahle uh a genkhiatlouh lai unle nidang a atuailai hunte uh ngaihtuahtuah saam ding uh ahi. Ei' bang a a utna teng a phakzoh lai nite ubang, i' pi-pu toh bang a kihih heuhau-kingaihlai hunte uh guuk suutsuut a, lungzuang kisa a khituui a guuknuul hun uh om kha mohlou ding hi.

Bang i chikep dia....The choice is ours.

(C) Lian Suantak @ 25/01/2014

 

Ka Pi (as on January 04, 2013)