Imphal Airport Update | 2016 Dec 17

Reached Imphal Airport safe and sound. However, could not proceed any further as the bandh called by some Organisations is very strict. Travellers thronged the Airport lounge with their luggage. The State Govt.'s Administration breaks - down as no help can be expected anywhere near.

Passengers looked worn out and exhausted as not even a cup of tea is available at the Airport premises even though it has an international Airport tag. The Street bears a deserted look excepting few vehicles displaying 'Airport' stickers plying.

(Posted in Facebook on December 17, 2016)

Report | 400 Days of People’s Movement | Jantar Mantar, New Delhi | 2016 October 4

🌱August 31, 2015 a Manipur Assembly a 3 Bills ki-passed-te deihlou a mipi kiphinna khawllou a pai zomtou; tuni in ni 400 chingta hi. Ni 400 a chinni toh kiton in Salpha 9-te suunna leh kiphinna Jantar Mantar a MTFD site ah Niteng a khawllou a paikhawm gige, Indongtate, makaihna in neih in om hi. Huai hun in paikhawmte’n ki-itna ankuang leng sawkkhawm uhi.

🌱Lia Ngaipi Dousel leh Pa Pumliankhai-te’n hunpi makaih uhi. Upa Khamkhansuan Tombing in Pathian kiang a thumna in hun hong hi. Pa Mangno Ngaihte leh Lia Janeth Muang makaihna in mipi’n phatna la kisakhawm hi. Pa Lian Suantak in mipite vaidawnna leh Movement a bul apan i tunna chiang suut in tulel a Challenges i maituah lelte taklang hi.

🌱Pa Sieka Gangte in thugenna nei in mipite khawl mailou ding in hasotna manphatak nei hi. Tuazoh 6th Schedule ngim deuh in thugenna manpha taktak Pu Khatchin Langel, Pu Thangkhanlal Ngaihte leh Nu Dorothy Nem Guite apan ngaihkhiatna om nawn hi. 6th Schedule i chih Manipur a singtangmite adia i tantuan Indian Constitution a kigelhsa ahi a, i phut dingleh i muh ding ua kilawm mah ahihman in lungke lou a i phuut zomzel ding uh, chih gen chiat ahi.

🌱Pu Romeo, MTFD Convenor in paikhawm mipite kiang ah khawllou a Jantar Mantar a Protest ana sunzom gigete phat-huai a sakdan gen in Salpha 9-te’n a hinna manphatakte uh itlou a ana pe hilhial uh ahihman in midangte’n i theih khamkham ua i panna uh thupilua ahihlai in; khawl theivual hilou i hi, tawllua leh hahpanlua kichi mailou in kuhkal suah semsem ni, chi’n hasotna leh chouna manphatak nei hi.

🌱Salpha-te suunna hun Htp. Muan Vualnam in makaih a, salphate kipiakna thupidan suut in mipite kiang ah Pathian hatna muang in Salphate suunna leh zahna in ni 600 chintan Protest sunzom dia kiman kuateng hiam chi’n khut liikna ding hun hong hi. Mi tampi mah in salpha-te zahtakna leh suunna manphapen hi ding chi’n a khut uh liik uhi. Tua zoh in mipite’n slogan, ‘Lungtup mualsuahma… Khawllou ding,’ ‘Lungtup mualsuah ma salphate… Vuilou ding,’ ‘We Want… Justice,’ ‘We Want… 6th Schedule,’ samh uhi.

🌱Salphate kipiakna ngaihtuah kawm in Suunna hun zang in mipite minute khat daai zikzek in om uhi. Salphate zahtakna leh amaute itna taklatna in naupang omkhate mipite mai a dingkhia in, amaute khut apan Candle de vaak chiat uhi.

🌱Vote of Thanks Pa Thanglianlal in a genzoh in Upa Biakkhanmang Guite in hun khakna leh ankuang latna thumna nei hi. Paikhawm mipite’n itna ankuang sawkkhawm uhi.

(Poster in Facebook  

 Report | 400 Days of People’s Movemet | Jantar Mantar, New Delhi — in New Delhi, India.

October 2016 · )

Report | TRVM - Project COFRELA | 1st Awareness Program

Pa Sasang Samte' Inn, H.No.44 (1st floor), Munirka, New Delhi ah nisim 25-03-2016 (Friday), 8:15 - 11:00pm in i gamsung bawlhoih ding lunggulh a paikhawmte'n Awareness masa kinei hi. Hiai hun a paikhawmte'n hun saulou aamtak in kizang a, lametna lianpi toh inlam kikik chiat hi. Maban ah hichibang awareness tamthei lamlam neih touhzel kisawm hi.

Awareness program Pu Hau Tunglut, Chief Moderator in hon pi a, COFRELA vision statement hon puangkhia in thugenna saulou hon nei masa hi. Aman a genna ah tulel in khenkhat in i tup-le-ngimte ahi ding bangtak in thei siam zou nailou ahihman un maban ah awareness program zattouh zel hi dia, mipite support leng hong hoih hiaihiai ding in lametna liantak nei hi. Pu Muan Vualnam, Moderator - Secretary in Projector zang in Demonstration hon pi hi. I gamsung siat gawpdan leh bangchi panlak a hoih ding hiam chihte nouneltak in hon suutpih hi. Tu bang a apai touhzel leh tunung kum 3 zoh chiang in Lamka bang chi di'n na gingta a? Chihleh tunung kum 3 zohchiah Lamka khopi dinmun dia na deihdan hon gen in, chihte in brainstorming session hon makaih hi.

Dotna & dawnna hun ah Moderator-Secretary in a genna ah Tu-le-tu in Project COFRELA in maban kalsuanna ah tup pipen/ lianpen 80% vel Mass Education/ Awareness on Anti-Corruption lam focus hiding chi hi. Huailou in, khoih bat chiangchiang issues etkai ding ki-ut a; Tu-le-tu in bel i hihzoh ding leh zohlouh dingte theihkhen phot ngai a sakdan gen hi. Thilteng va ban nawk touhpen in bangtan mah hon tunpih zoulou ding ahihman in resources neihdan enkawm a pilvangtak a kalsuan kisawm chi.

Discussion hun in i gamsung siatna gal-et mai theih hilou ahihman in i gamsung siatna bawlpha dia i kipat baihleh a hunlai hikha ding hi. Tu inle zekai lam i hita phial diam chih ngaihtuahna toh, 'DELH LENG PHALAI NGEI DING I HI' chih gintakna liantak kinei hi. Kuapeuh in i gamsung siatna gal-et mailou a kithuap a kalsuan khawm dialdial thei leng ma kitelh ding ahihdan kiphawk thakthak hi.

Tuni Awareness program hun in Projector Evan Paul Pauzakham in hon zangsak hi. Htp. Sasang Samte in a Inn uh kiphaltak in hon zangsak a, Htn. Nem Langel in refreshments hon thoh a; amaute tung ah paikhawmte kipak petmah uhi.

REPORT | Official Launching of TRVM and Project COFRELA

Tribal Rights Vigil, Manipur (TRVM) nisim 18th March 2016 in phuhkhiat ahi a, mipi theih a puankhiatna nisim 20th March, 2016, 2:30pm in Pu Romeo T. Hmar, Convenor MTFD in Pi Dorothy Nem Guite’ Quarter, R.K. Puram, New Delhi ah nei hi. Hiai hun ah Delhi Paite Indongta (DPI) leh SSPP JHQ Delhi apan palai khenkhat tel in mipi hunkuam paikhawm hi. Pu Muan Vualnam, Moderator, TRVM in maban tup-leh-ngimte taklatna leh Project COFRELA (COrruption FREe LAmka) Demonstration tomkim leng nei ngal hi.

Hiai hun ah Conductor in Pu Hau Tunglut, Chief Moderator TRVM pang hi. Pu Lian Suantak, Moderator in TRVM kiphuhkhiatdan leh dinsan pulakna saulou nei hi. I gam ah tuhun bangbang in thudik-thutang deihna leh nekguk-takgukna leh injustice deihlouhna muhtheih a kilangsak ngei nailou i hi uh, chi. I gam a kisiamthakna deih a khitui luang zungzungte khawl nailou ahihdan leng gen hi. A hunlai a i ngaihsak keileh hiaibang a Social Reformation deih a i khituite a hong kan hun om ding ahi. Tuhun bang a reformation deihna khitui luang denlou kha ding ahi chi.

Pu Romeo in TRVM leh Project COFRELA hongkhia in thugenna manphatak nei hi. Pu Romeo in a genna ah TRVM kichi MTFD gahsuah hi a, MTFD in thil tuamtuam tampi sai a hihman in thil hoih teng leng ki-enkai zoulou a hihna ah hiaibang pawl a hong kiphuhkhiat kipahpihhuai a sakdan leh a poimoh bangbang MTFD in kithuahpih zel ding, chi hi. I haksatna tampite kipatna bulpi Corruption hi a, nakpi a i dou poimoh a sakdan leng gen hi. RTI manphatak a i zat sawm ding uh ahihdan leng gen hi. Thil paidan dikloute pholhkhezel le’ng hun hong paizel dingte ah mi tampite’n nekguk-takgukna a hoihlouhdan hon thei ding uh chi hi. I District hahsiang masa in thil hoih i septe’n District dangte bang lohsawn theileh deihhuailua ahi, chi. Maban 2017 Election chiang in Corruption ka bawlkei ding chia kichiam ngam kipoimoh ahi; Nekguk-takgukna apan ka kikem siangthou ding chi-a pledge bawl ngamlou Candidate a hong omleh Palai dia deihhuai lou ahihman in mipi’n palai ding i telchiang un pilvang chiat ni chi. Tribal movement ah tu-le-tu a hon zuithei nailoute bang leng pampaih hetlou a, i huaitheih poimoh chi. Manipur a Tribal-te a kikhenthei ki-omlou ahihman in kitawng tuah mailou a, kal i suankhawm uh poimoh petmah ahi, chi.

Pu Biaklun Shoute in hasotna manphatak gen hi. I hinkhua ah Strategy hoihtak i neih poimoh mahmah a, huaikia a hunlou in a sepsuahdan Execution ah lohchinna kinga lian mahmah chi hi. Pawlpi himhim ah Organisational Structure hoihtak i neih poimoh a; abul pat dik in maban ah lamzanna hon tun ding, chi hi. Banghiam sep ding bawl ding i geellai in sepdia taak mah hiam chihte suut a geel detdet kuul chi hi. Thutak a dinkip a poimohdan leng nasatak in gen hi. A genzelna ah thil i saite personalised ngeilouh ding ahihdan leh i thil saite ah kinoh hehu lou a geel detdet a kalsuan poimoh lua ahi, chi.

Pu Vumsuan Naulak in thugenna manphatak nei hi. Aman a genna ah thil hoih semnuam a panla dia kisa na hihman un kipahhuai lua ahi, chi. Thil hoih sem dia i kipat chiang in kuapeuh in leng hon pakta hi; himahleh amau khoihkha dia i hong kisak taktak chiang a hong buai uh ahi, chi. I gam ah Corruption ziak a i gam deihbang a khang theilou ahi chih kuapeuh in pomchiat mahleh Solkar a Department-te diktak a nna sem tam hetlou ahihman in corruption sual a na panlakna uh a taktak a hon kipahpih khollou ding uh ahi. Na gintak bang ua mi’n hon na welcome khollou ding uh ahi chih theih masak hoih, chi. I gam a a-system dan a ana paitou himahleh thil diklou tampi omte bang leng hon taklang hi.

Pi Dorothy Nem Guite, Moderator in Corruption sualna ah mipite education tungtawn a thilhoih deihna chi tuh a poimohdan gen hi. Hun tomchik sung a sepkhiat a gah muh ding om lelu pahkei lehle awl a corruption douna a hong lohchin ngei deihhuai a sakdan gen. A koi gam hitaleh Corruption a om hetlouhna gamzaw omlou ding ahi. Bangteng hileh, nekguk-takguk hoihlou ahihdan i kichituh zoh a mipite lak ah nekguk hoihlou eive chih theihna a hong om lehle TRVM lohching hipah lou hiam chi.

Report | 171st Day

Report on Protest against Anti-Tribal bills | New Delhi dated 18/02/2016 (Thursday) | 171st Day of Protest | Jantar Mantar a Protest Nov. 4, 2015 a ana kipan tuni in ni 107 chingta hi.

👉

Salphate suun ding leh Protest dia paikhawmte'n puaknatte kishare khawm masa hi. Sharing sau loulou in:

👉

• Pu Hau Tunglut: Nam Hampha i hi. Mi nuai a om ding hilou; mi tung a om dia bawl a ki-om. Israel-te Pathian in Meipi leh Meikuang a pi a a-om nung a tuipi san kaan ding a neih bang un i buainate i phut paisuak poimoh. Pathian in discipline taak a hon koih kipahhuai lua. Pathian in a deihbang a seek leh taathiam a i om theih poimoh. Lamkiang a hon na bauh leh hon na nanate ah kibuaisak lou in mailam en a pai giugeu ding. I liangzang a mohpuakna/obligation om hangsantak a phukai di'n pangkhawm leng Khatvei ni chiang a THUTAK in hon suaktasak ding hi.

👉

• Pu Sangpu Tangpua: Mihing a piangkhe peuh in sihna i maituah chiat ding uh. Huaiziak in lauthawng in omkei ni. Thutak a din giugeu ding. Itna in lauhna hawlmang ahihman in lauhna i neihleh i Gam-le-nam i ITNA chikzou taktak nailou hi thei. Tribal movement a i fight dik ahihman in a tawptan dong a lauthawng lou a i gup ngam ding. Tulai a nambing kaal chidamlou chi'n kingaise maikei ni. Tulai a thusia lenglengte i gintak vek ding hilou. Thusia veek a kipeite i gintakte ana hi khollou ding. Thadou/Paite pau zang a controversial taktak thu kisuahte a Thadou/Paite namte thusuah hi vek khollou ahi. Thu ana vekveek pawl om ahi chih i haihlouh ding. Distractions tuamtuamte ziak in i focus mangsak kei ni.

👉

• Pu Muan Vualnam: Circumstances ziak a Protest a kipai sek. Kuamah i movement a kidangkoih thei ding ki-om lou. I gam in a hon poimoh lai a zat khak theih dia om kipaklua. I movement uh 'God's driven movement' ahi a, lungluthuai lua. Kum 5 nung a society hoih ka deih chiteng in khut liik di, chi. (Vek a kiliik). Huchihleh, Kum 5 nung a Society hoih i neihtheih na dia tuni a i sep ding om. I movement ah stage tuamtuam ah vualzohna ana kingah. Tua i sual lellel pen COMMUNAL DISHARMONY ahi. Hiaipen PATIENCE a i zohsawm ding. Paite-te a dingkia sual kihilou ahihman in Communalism kichi Patience a zoh i sawm ding. Thuak ding om lehle thuak hamham lai ni. Khatvei tei i kiim aten hon theisiam na ding uh. I gam in lehkha siamte kia poimoh hi nawnlou in gamsung bawlhoih nuamte ahi a poimoh. I gamsung i bawlhoih poimoh. Freedom leng kipoimoh lua. Tuni dong a RIGHTS leh hamphatnate ki-enjoy thei nailou lai. Huaiziak in Indian Constitution nuai a Article 371C i theihsiam chiat poimoh. Huaiziak a mass education kipoimoh lua. Mahni a ding kia hiam, mahni family a ding kia i khual huntawk lou; i society mahmah a ding i khualbat poimoh lua.

👉

• Nungak Thianching: Gam itna kichi 6th Schedule hiam Statehood muhna tan kia i sakkhak ding lauhhuai. Nam Hampha i kichi a, himahleh i taksap uh om ahi. Ladakh-te gam itdan bang Sikkim-te gam galmuandan bang etton taak petmah. Sikkim bang ei gam mahbang a Singtang gam hithou na a crime rate 1% le pha khollou, gam galmuang petmah ahi. Sikkim a IPS officer khat in a gam mipite hoihlua ahihman un kou ka sep ding uh omlou chi hial. Ei gam i etleh nitak bang bit kisaklouhna lianlua. Diktatna mahmah bangle kitasam lua. Sikkim bang chu Govt kaam seem tamlua le hilou uh. Himahleh a diktat ziak uleh a gam galmuan ziak a Tourist bang tam-a tamthei mai. Huaiziak a agam uh khang hulhul mai.

👉

Slogan shouting banah 1 Minute silence leh Candle lighting leng Martyr-te zahna in kinei hi.

👉

Article 371C Paite pau a kilet honna kinei. Newspaper tuamtuamte ah Sunday issue a suahkhiat dia piak/khak kisawm. Inlam Newspaper-te'n Gam-le-nam itna ziak a hon suahsak ding uh kingen hi.

👉

Zingchiang nitaklam in Salphate suunna leh Protest nei dia a utte kipaikhawm nawn ding ahi.

Report | 169Th Day

Brief Report on Protest against Anti-Tribal bills | New Delhi dated 15/02/2016 (Tuesday) | 169th Day of Protest | Jantar Mantar a Protest Nov. 4, 2015 a ana kipan tuni in ni 104 chingta hi. Informal program kizang hi.

👉

• Salphate suun leh Protest dia paikhawmte'n hun paisa a mimal thil tuahkhak experience tuamtuam kishare khawm masa hi.

👉

• Seminar on 'Manipur Legislative Assembly (Hill Areas Committee) Order, 1972' kinei hi. Singpi nihvei kidawnkhawm.

👉

• Slogan shouting leh 1 Minute silence banah Candle Lighting Martyr-te zahna in kinei hi.

👉

• MARTYRS family, MTFD, JAC, leader tuamtuamte, etc. ading in thumna leng neih in om hi.

👉

• Indian Constitution nuai a Article 371C Paite pau a simple leh theihsiamhuai banah mimawlpen inle a theihsiam dia kigelh Pathianni a suak ding Newspaper-te a suahkhiat sak kisawm.

SALPHATE SUUNNA LEH HOULUNGKUP ZAAN | SALPHATE MORGUE | LAMA | INDIA

REPORT on ALERT ZONE & THE SINGTANGMITE
Present 
SALPHATE SUUNNA LEH HOULUNGKUP ZAAN
Compiled by-David Gouz & Lian Suantak

Patna thumna Nu Nemneilhing, m/o Salpha Khaizamang Touthang, in nei hi.
Introduction saulou leh Vaidawnna Lian Suantak in bawl in, i movement uh hatzawk semna ding ngimna a hiai bang program kisawm ahi, chi. Tu December-January naupangte school khawl hun a Dharna/protest-te i khawl mawk uh; hun pammaihlua ahi. Tuhun in Protest/Dharna sawm leng Student-te khawllai ahihman in mi tampi Full time a tel thei ding i hi uh chi hi.

#Thumkhawmna pitu Pastor Benson in Jeremia 7:1-11 pansan in thugenna saulou hon nei masa in thumna dia theihtuak khenkhat hon gen hi:

• I kipumkhat sem na ding uleh i diktat/kithutuah na ding uh. 

• Delhi lam a makai leh mipite a ding.

• I Movement uh kitatsat lou a pawl tuamtuamte’n pan hon laak touhzel theihna ding. 

• Numei pawlte/ nute a ding.

• Pawl tuamtuam a i makaite a ding.

• India President/ Prime Minister leh a Cabinet-te a ding. Adik-atang a ei Singtangmite a dia vai hon hawmsak theihna ding uh.

• Theih phaklouh mipi tampi i movement ua dia pangte a ding.

• Media/ Social networking site tuamtuam enkaite a ding.

• Saptuam heutu/ makaite a ding.

• Foreign leh gamdang a i unaupihte a ding. Eite Pathian’ Dan toh kituak a diktattak a i hin theihna ding. Pathian’ vaihawmna i ngak zohna ding.

• I movement deihlou a ana lehpan leh dikloutak a gamtat poisa loute a ding.

Hiai point-te gen khit in mipi'n thum khawmna kinei hi.

#Salpha inkuante apan thugenna Pastor V. Jamkhanthang in nei hi. Aman a genna ah i Movement [August 31, 2015 apan January 8 2016 (130 days)] sung i etkik chiang in i Movement uh maban sawnlou abat ziak in salpha 9-te’ sungkuante lungkim hetlou ahi uh, chi. Salpha 9-te kua phawkphak nawnlouh bangmai in Morgue ah daai dide in omsek ua, mi tamlou chik in hon ompih lel ua; hiai mi tawmchikte ziak in i Movement uh pai thei liailiai ahi chi hi. Salphate’ sungkuante chihlouh i heutu muan mahmahte'n leng hon khawl/daihsan uh a bang. Sivui utna leh Tribal movement daaltu di chi (seed) bang hong kituh in Victim family-te'n le warning tampi ka tuakta uh. Ka khasiatnapen uh ahihleh kuahiam in, "Ka hon gaal mankei a, ka office ah hong pai un," chia singpi nou khat delh a ka tai hun uh atam. Gen-leh-sak nei lelah JAC-te kiang a a'piakkhiatsa uh, chia hong kisoisel zel. Ka tate uh Business, Politics thanghuaitak a zat di'n ka phalkei uh, zat-le hon zatsak kei un. Sum tam deih jiak a ka tate uh vui utlo kahi kei uh. Victim Family-te Football mah bang in alang-alang ah hon pi ua, haksa ka sa uh. JAC leh Govt of Manipur in Hiamkham a bawl na uah ka khasia ua, kou hiaithu bangmah hilh in ka omkei tel uhi. Meitei official-te tellou a ei Tribal v/s Tribal in Hiamkham a bawl tel uh poi kasa uh. JAC-te’n Govt of Manipur kia’h k’on ngaidam uh achih uh ka pomsiam kei uh.

JAC in Manipur Govt kiang ah Charter of Demand pe mahleh kou, salpha sungkuante, a hon ngaihsak kei uh; JAC-te’n kon ngaidam achih jiak un ahi. Delhi a MTFD-te ngetna bang in victim Family-te’n F.I.R ngetna lai ka pia ua, himahleh hon ngaihsak louh jiak un poi kasa uh. JPO-te’n FIR kibawlkhin a chih uh leng Police te’n amau ki-defend na dinglel a abawl uh ana hi leltak. Kou, salpha sungkuante’n den chia jail baang khong zuut ka maban uh ahi. JAC-te’n Martyr-te hon pekhe mai uh henla, Government kiang ah si uh ahi chih report le ung ka ut mahmah mai uhi. FIR ki-file-te leng tutan in aliing hiam, maban asawn lam leng ka theikei uh. Martyr-te thu bangmah gen theilou dia suai n'on kaihsak ngal ualeh kon muanbang un, leh diktatdeuh in makaite’n pan hon la ve ua. Kou UISIH-AAKSIH a si mai di maw?? I sep ding omte thulhthulh lou in sem toule chih deihhuai kasa uhi. Student leh Numei Pawl hong kipante lah saptuam zang khong a mekmit hizel. Ei sung a divide & rule zang a Victim Family-te hon holh le na om ua, huaite'n hon tawpsan un, chi'n a hun zou hi.

#SLOGAN SHOUTING hun Pu Lian Suantak in hon makaih a, Mumbai apan a’ lawmte'n Salphate adia sum Rs. 20,000/- hon khak uh hawmkhiatna hon nei masa hi. Salpha Inkuante’ inkuan-khosakdan kibatlouh ziak in sum a tandan uh kibanglou ding ahihman in a kuakua in theisiam ding in ngen masa hi. JPO Convenor Pu Mangcha Thangzom in Salpha inkuante kiang ah sum piakkhiatna nei hi.

• Salpha Inkuan li kiang ah Rs.2500/- chiat piak ahi. Amaute: 1).Salpha Pausuanlian, 2).Salpha H. Paulianmang, 3).Salpha Khaizamang Touthang & 4).Salpha K. Lamkhenthang.

• Salpha Inkuan nga kiang ah Rs.2000/- chiat piak ahi. Amaute: 1).Salpha Robert V. Jamminthang, 2).Salpha Enkhankhup suante, 3).Salpha Thangzalian Phaipi, 4).Salpha Khamsianmuan & 5).Salpha Henlalson Gangte.

Tribal Unity leh FIR tungtang hon tangkou pihzek in, movement ngaihsaklou a bangpi hihle hi tuanlou a mahni inlum a ki-om a, meiphu ki-awi maite hon kikou keep ka hi uh. Hiai a ka kikouna uh bangdang ziak hilou in, na innmun uh khawng hon humbit sak sawmna ahihman in inn a om a, bangpi hihle hi tuanloute’n, gam leh leitang humbit ut a Dharna tu gigete singpi nou khatbek hon pe le uchin eive le, chi’n challenge bawl hi. Tuzan i slogan samh ding uh; a minpu a samh mailou a, lungsim taktak a hong pawt gam-leh-nam itna ziak a samh ding ahi. Huaiziak in a minpu maimai a samh ding na hihleh samh se dah in, chi hi.

Hiai Hospital mahmah ah Doctor leh nurse tampi na om ua, hiai Morgue mun ah minute bangzah salpha inkuante nana tutpih khata a? Ahih theihleh zingchia kipan Doctor hi’n nurse hile chinle na hun manphatak minute 5 bek hon pe di’n kon ngen hi. Hiaimun ah officer lianpipi na om ua; Salpha innkuante minute 5 lelle tutpi dia maw na hun uh na it uh! Nou a ding le hi khathou eive, gim-leh-tawl khawksa lou a ana tute tutsan. Lehkhaden deng leh zu dawn a hun tampi na zatbei sang un hiai mun ah na hun minute 5 lel na zat uh manphazaw hilou hiam, chi in slogan sapna hon makaih hi.

SLOGAN kisamhte:

ü  LONG LIVE- TRIBAL UNITY!

ü  DELHI-TE – LUNGKE KEI UN!

ü  FIR-KINTAK IN!

ü  UNAU KUKI-TE- DAMSAWT HEN!

ü  UNAU HMAR-TE – DAMSAWT HEN!

ü  UNAU HMAR-TE – DAMSAWT HEN!

ü  UNAU NAGA-TE – DAMSAWT HEN!

ü  UNAU ZOMI-TE – DAMSAWT HEN!

#All Manipur Tribal Women Union Churachandpur (AMTWUC) apan nu Nianglian in KIKIMNA & PANKHAWMNA chih pansan in thugenna hon nei hi. Esther 4:12 a simzoh in numei pawlte panlakna tuamtuamte hon gen hi. Leitang thu a hihziak in akua-akua in na kisa chiat a, ei pang keile kua pang ding hiam, chi’n mipite chouna hon bawl hi. Numei pawlte toh kisai UPDATE hon bawlna ah tunaizek a Sinzawl program thu ah JAC-te kihoupih a, amau toh kithuzak in Dec. 27, 3.30 pm vel in information kipia in duty kihawm hi. Dec.28 zingkal dak 4 in duty kipan in i pantheih dandan in pangle Pathian in vualzohna hon pe ngei ding ahi chi-a kihanthawn in, gam-leh-nam it ziak in pitek apan naunawi pe laite na ngawn hong pang uh, chi. 3 Bill-te deihlouhna leh Manipur Govt-te ki-against ahi chihna a kidaal ahi a, haksatna tampi toh ki zaanhak hit-het hi. Mipite kipiakzohna ziak in Tribal Women-te Calender le kibawlzou ahi chi hi. Thil banghiam a omleh thudik zonkhiak ding ahi. Tribal numeite hansanna leh a thupi’ bang un pasal-te’n leng hon nungthuap un, chi’n ngen hi. Hun paisa a hihkhelh omte ah i kingaidam ding ua; tuapat kituaktak a pai a, khe-khat a dingkhawm ding; ban ah i pilvanna ding uh bel - Unity toh kisai a kihouhou a, atawp a hitheilou hiveh aw chia i khit naakpen poi lua ahi, chi. ‘Hithei’ chi in pangle hang hithei ding ahi. Thutak ah dingkip lehang history a manglou ding ahi. I lungtup i zasak ding a, pangkhawm lehang i tup lohching ding ihi chi hi.

# Joint Philantrophic Organisation (JPO) apan Convenor Pu Mangcha Thangzom in I PANLAKNA ULEH MABAN chih pansan in thugenna hon nei hi. I subject lou a kalsuanna om khak cia kisuanlahna lianpi om hi. Boundary nei a nna seem kihi vek ahi-a, JPO-te mohpuakna hong kipia-pen Post Mortem bawl chauh ahi a, himahleh thu tuamtuam hong om in, hong kikai matvek hi. Unity a poimohpen ahi a, Bill 3-te 7vei bang si lehle ei ah kipumkhatna a om keileh Meiteite’n hon nuaisiah thouthou ding uh ahi. Tribal unity toh kisai a Whatsapp leh Facebook kihouna khawng a kitawng a i om sang in thuhoih i sakte gum in, hoihlou i sakte dawng sekei le hoih in i damna hizaw ding, chi. Thumna tawh pang in kalsuan le ei adia lampi hong om ding ahi chi in ahun zou hi.

# All Tribal Student Union Manipur (ATSUM) apan Tribunal General Pu Muan Tombing in KIPUMKHATNA & CHALLENGES pansan in thugenna hon nei hi. Tutung i thilsual ua thil kihihte himhim mimal kuahiam mahni a dia sual ki-omlou a, Gam leitang thu ahihman in i gam a dia sual i hi. Kia thamlou in khangsawnte a dia le sual i hi chi hi. Haksatna tuamtuam tampi i tuak ua District tuamtuam a heutute kikaikhawm in meeting kisai a (at Lamka), Kithutuaktak in i tribal pihte tawh ki-support himahle eilam, i Innpi lamte’n thutuam ana sai manzel chiang ua kipaikhawm thei taktak lou ahi. I sung a naktak in Divide & Rule kichi kipumkhatna susetu hon play Manipur Govt ahi a, amau i Movement uh betdaih ngeingei ding leh i thuneihnate tawmsak deuhdeuh ding sawm in pan naktak a la ahihman un i ma uah challenges i neihte doukhawm le i lohching di ua, nang leh kei i din ke’h kuan hon humbit ding? I representative-te kam-khat a pau uh ei kam sawm sa’h ngaihzaw hi-a, hilehle tutan kuamah apau om nailou a, poi mahmah chi. Lungsim zazaw pu in, i ginomna hihhaat thak ni. Hiai i movement i lohching ma ua i tawp ngeingei uleh haksatna tuaktam deuhdeuh ding i hi. I khosuahna ding gum ngam a pau ding heutu poimoh i hi. I movement a khawlleh nelhsiahna uang deuhdeuh ding, chi hi.

# Pu Khamkhanthuam, Advocate in LEGAL ASPECTS ON TRIBAL ISSUES chih pansan in thugenna hon nei hi. Govt. paidan in FIR poimoh petmah a, a Family-te’n a complaint ding uh ahi chi. Tutan FIR register louh a a-om poi asak thu leng gen hi. Tutung 3-Bills toh kisai leng a hih theihtawp suah in talk-show bangle 2-vei a lawmte toh poimoh a sak jiak ua bawlta ahihdan hon gen hi. Indian Constitution toh kituak in dan kibawl peuhmah in Fundamental Rights a kalh louh ding chih ahi a, tua 3 Bill-te’n kalhkha ahihman in unconstitutional hivek ahihziak in hiai bill-te kideihlou a, apaisuak bel lamet huailou chi. Eilak ah legal awareness naktak a bawl poimoh a sakdan leng gen hi. Indian Constitution nuai a MDC i neih theih hamham leng Manipur govt. in financial power hon lak khiaksak ziak in 30% kia zattheih in om hi. Hiai deihlou a 6th Shedule i ngetlai in unau Naga lamte lemtanlouh ziak in zat theihlouh nilouh in omzel hi. Bangteng hileh dan nuai a om i hi a, tua dan bangtak a zat theih ahih a, i hamphatpih theihna ding in a theite dong in, panla lehang i gam humbit theihna ding ngah ding i hi chi hi.

# Tuazoh in tuzaan a MTFD makaihna a New Delhi a Jantar mantar mun a Slogan thusamhte ngaihkhiatna kinei hi.

# Pastor Benson in I KINGAKNA & KIBULPHUHNA chih pansan in thugenna hon nei hi. Singtangmite kibulhphuhna ding i biak Pathian a omlai ziak in lungmuanhuai in, kipahhuai hi. Amos 5:12 pansan in Pathian mitmuh a thil dik kichi bel imi-isa te’n thil i hih a i gup ngam a, pan i lak a, i gen ngam a poimohdan hon gen hi.
Diktatna tellou in i saptuam leh gam-leh-nam leng pukse ding ahi, chi. Diktatna in nam khat peuhpeuh adik in a tawisang a, diktatlouhna in i nam pukse sak ding ahi.
I kisaktheih ziak un pukse dimdem ding i hi. Pathian’ diktatna tawisang a, Pathian hing bia dan a kikoih a kimuang mahmah napi i gup taktak louh jiak un pukse dimdem ding i hi. Khristian, Pathian hing kibia himahleh diktatna paipih lou a, diktatna i kaih kawileh Pathian hing bia hi tawk lengle i pukse dimdem ding uh. Sianthoutak a Pathian i biak keileh i Khristian hihna bangmahlou hi veve ding hi, Khristian hihna or society i puah utleh a masapen a i saptuam leh eimah i kisuk siangthou a, diktatna a kipuah masak kul hi. Tua hileh i society uh hong dik ding ahi. Civil Righteousness a diktatna poimoh masa penpen hi. ‘Where is God?’ chichi mahle Pathian in a background a na sem gige ahi. Khotang lak ah diktatna i paipi keileh khotang pukse ding ahi. Pathian in diktatna tellou haw mahmah ahi chi’n a hun zou hi.

# Dotna leh dawnna hun saulou hon hi a, huai hun ah Lian Suantak in: JPO-te’n misi suunna/ gaalna a Morgue a lenkhawmna January 5, 2016 tan Krismas-Kumthak ziak a break puang chih ah; tuni January 8 hita a, chikciang a pan nawn ding na hi ua, chih dong mahleh JPO lamte a paikhit vek ziak un JPO a pan dawng tu ding omlou suak hi.

# Short Speech Nu Biakmawi in hon nei a, Thugenna hun conductor in a piak ziak in kipahthu gen masa hi. I gam-leh-naam in nekgukna tangkoupih ngamlou i hi uhiam? A ngam na omkei uleh mipite mansa gige ka hi uh. Superintendent of Police (SP) kiang a i Salphate toh kisai FIR bulh di gen ngam lou ding maw?? Sepaih thahatna ziak a i gam vengbit dingte’n hon vengbit lou uh ahihman in i gam-leh-nam vengbit thei omsun mipi-te ahi. Lim (Photo) kila ding maimai a hiai mun a salphate omna ah kuamah va pai nawnlou ding in mipite ngen hi. Tuabang a Salphate suun taktak leng hilou a lim va kilakpih maimaite: a en tute adia nuamlou leh thuak hak mahmah ahi chi.

# Candle lighting hun Pu Lian suantak in hon pi in, Salpha inkuan 9-te apan mi 9 mipi mai ah hong dingkhia ua, amaute Candle apan mipi’n mahni candle chiat kidevak hi. Candle omzia amah kidetum a vaak piakkhiat ding chih ahi. Huai vaak pansan in siamna kizong in lehkha simna di’n kizang sek hi. Tuhun in bel Salphate’n amau hinna siit neilou in mipite ading in pekhia ua, amaute itna, suunna leh zahtakna leh Protest-na in Candle kidevaak hi. 2-Minutes silence ‘a tribute to our heroes’ neihzoh in hun khakna ding in Upa Jamsangchin in thumna nei hi. Salpha innkuante’n a candle-te uh hon koih masa ua, amau hih bangbang in mipi’n amau nung zui diamdiam in program khak ahi.

Program zatna dia Kiphal Chiamteh thamte:

ü  Sound, Light & Generator hong enkai: Pu Mangboi Lethil

ü  Coffee: Pu Coleson Vualnam & Pu Siampu Thomte

ü  Rs 700/- hon thoh Pu Gousut

ü  Rs 500/- ngen hon thoh: Pu Biaklun Shoute, Pu Ginbiakthang Suantak, Pu    Goukhanchin Hangzo leh Pu Chinmuansang

ü  Nu Mary –Generator

ü  Media coverage hoihtak HORNBILL CABLE NETWORK in hon bawlsak hi

HIAI HUN A LAM CHI TUAMTUAM A HON KITHUAHPIH MIMAL, MIPITE LEH SEH A OM BANGBANG LUNGTUNHUAITAK A HONG SUBUCHING KHEMPEUH ALERT ZONE LEH THE SINGTAMITE WHATSAPP GROUP-TE’N NA VEK UA TUNG AH KIPAHTHU KON GEN UH HI

OUR LAND - OUR RIGHTS - OUR IDENTITY