SAPNA I DAWNG THEI DIAM

Manipur a Tangmite’n i omna chiat uah August 31, 2015 ni a Manipur Legislative Assembly a Bill thum ki-passed deihlouh ziak in i hihtheih bang chiat un kiphinna nasatak kipan chiat hi. Lamka ah Minister, MP leh MLA-te’ inn halsak in kiphinna huaise petmah kuangzak hi. Hiai kiphinna in khopi tuamtuam Delhi, Bangalore, Chennai, Guwahati, etc. genlouh Gam tuamtuam USA, Japan, South Korea, France, Germany, etc. dengsuak hi. Mun tuamtuam ah Tribal-te’n pawl tuamtuam Forum leh Union min zang in hihtheih bangbang kisuah chiat hi. Tuni chiang in bel a hun mahmah le sawtkuam hita ahihman in mipi’ support mu Manipur ah JAC leh Delhi ah MTFD in khawllou in kiphinna sunzom touzel lai hi. Kiphinna khawlzok ding leng banglou hi.

Lamka leh Delhi chihlouh mundang ah protest thawm zaak ding om mang nawnlou hi. Lamka i chih Protest kipatna/ Epicentre ahi a, Delhi pen phualpi solkar tutphah ahihziak mahle’ng ahi. Deihdan hithei hileh Imphal mahmah ah Protest kipan theileh deihhuai petmah hi. Ahi a, amun a omte’n ma hon kaihkei uleh gaal gen i chih khenkhatte ading in zaak nuamlou thei hi. Ahi a, tutung a bill passed a omte a huaisiat dingdan mukhol mah in hihtheih bangbang toh khopi tuamtuam ah i na kiphinnate uh sutzop touhzel hithei leh chihhuai ka sa mahmah hi. Delhi leh Lamka bangzen a protest va neih zuazua phatuam lawlou ding ahihtaak lehle JAC leh MTFD panpihna lam tuamtuam ah piak theih gige hi.

Delhi ah MTFD makaihna in Protest Jantar Mantar ah kinei touzel hi. Puanbuk/ Tent khelhman niteng in sum hunkhoptak piakkhiat hi gige hi. Mundang a omte’n tribal cause ah i hihtheih bangbang un i pangchiatta ngei ua, himahleh tunitan in i lohchinna muhtheih om nailou bang hi. Tuaziak in i tha zoisak mailou in Manipur Tribal-te sik-le-tang a nitaklam teng in Jantar Mantar ah a lunglutte Salphate suunna leh Protest sutzopna in paikhawm zellai uhi. MP, VIP va muh kichi miteng hihtheih hilou ahihman in ei mimal tek in i pan theihna om chiat hi. Pang-le i pang chiat namah ua, tunitan kalsuan tou theizel i hi uhi.

Tu’n JAC leh MTFD malakna in banghiam singtangmite’n kivaihawmna hoihzaw mu taktak ding dinmun ah ki-om bang hileh mipite i kimanta uh hiam chih mimal chih kidot tham ka sa hi. 6^th Schedule hiam UT bang mu zenzen lengle i gam a diktatlouhna leh nekgukna chihte i kibawl thakkei uleh i gam ah siatna a hong huaise zaw mai diam aw, ka chi hi. Diktatlouhna leh nekgukna i chihte a theilou i omkei ua, himahleh kalsuankhe dia kipia i Lamka zaang uah bangzah i om himhim ding ua. Theihna tan in suahtakna hon pe ding hileh zaw i gam hoihlaw mahmah ding hi a, himahleh theihna tan hilou a kipekhe ngam i tasam uh hi’n ka thei hi.

EN LIAMZEL MAI DING I HIAM, I GAM SIATNA? NANG-LEH-KE’N SAPNA I DAWNG THEI DIAM?