Lian Suantak: JAC Resolutions |14th Nov.2015

Tribe Innpi- Zomi Council, Kuki Innpi leh Hmar Inpui lemsakpihna toh 3 anti-tribals bills dou ding in muangtak in Joint Action Committee kichi mipi’n September 2, 2015 in dinsuah hi. JAC heutute’n mipi deihna bang in nna hon semzui ngal uhi. Ni 70 vaalbang bills nang in gim-le-tawl, haksatna tampite kal ah paitou uhi. Delhi tanpha va siik in Central Govt. a VVIP-te bang va mu in Delhi a Manipur Tribals Forum heutute toh kithuzak in kalsuan uhi. Manipur State Govt. toh ‘HIAMKHAM’ bang bawl in huai bohzuina in Manipur State Govt. kiang ah ‘Charter of Demands’ kichi November 9,2015 in pia uhi.

Abul apan Memorandum khat suahkhia; kheknawn. Adang suahnawn chidan in paitou nilouh uhi. A vangkim in Salpha-te vuiding chihbang hong gingzel in tuni chiangchiang in haksapi in mipi muanna ngah hiaihiai leh paidan dikzaw a pai panpan chih ding a omlai in November 14, 2015 in Martyrs-te luang vui ding thupukna hong om nawn ka zak in lamdang ka sa hi. Huaikia hilou in Charter of Demands November 9, 2015 a apiak uh a hunchiam ni 5 tung minmenpan, a suun ni leng tum nai zezenlou a a’ demand-te uh lohching chia pomtheih ding omloupi a Martyr-te vui ding thupukna a hon laakmai un hon suthadah mahmah hi.

Martyr-te luang bangzahta a kilawm in vuikhiat himahleh Manipur Tribals Forum, Delhi-te makaihna a Jantar Mantar, Delhi a Coffin Rally/ sit-in-protest nasatak a niamkiak ding chihte ka ngaihtuah chiang in JAC resolutions ka-na ah thalkiak hi. Mipi sou ka na theihdan in Martyr-te luang vuikhiat ding hithei sa mahmah lou hunkhop om ua, Martyr-te luang vui dia Lamka District Hospital apan puakkhiat hileh Morgue kiim ah a lungkimlou pawlte toh buaina nasatak piangpah ngal ding in ka gingta tinten hi. Luang 9 kikhamte i vuuiziak un luang a tamzaw a kikham lai mai kei ding maw, ka chi hi.

JAC resolutions ka sim suak thakthak a, lungtunhuai ka sa theikei. Aziak bel Ministry of Home Affairs apan written assurance kimu achihpen uh siluangte vuikhiat theihna ding khop a lungmuanhuai ka sakei hi. Tribalte deihdan in huai bill thumte a taksuak kei ding hiam, singtang gam ah a kizang kei ding chihna omlou a; Tribal-te leng dotkhak ahi ding chih hi leltak hi. Martyr-te luang a i demand uh kinga hikei mahleh huai bill-te deihlouh ziak a sihpihte’ laukha tawldamta ding in ka gingta naikei hi. Salphate a sihnung natan un Solkar toh kidekna ding a vanzat thupi a pang lailai uh ahi chih ka ngaihtuah in ka zahtakna a lian deuhdeuh hi.

JAC-te ngaihtuahna chiimtak toh kalsuan theilou ding hial in Innpi kichite a vangkim a kilaakzel uh hi’n leng ka za hi. Innpi-te Bills toh kisai in hong kidaihlah dah mai le uh hoih ka sa. A tung apan mohpuakna JAC khut a koihkheta ahi ngal ua. Banah, tu-le-tu a Zomi Council bang sukbei a hong om ahihtoh hiai Tribals issue ah bangziak a Kuki Innpi leh Hmar Inpui kia’n gen nei kha mawk ding hiam? Zomi Council sik a kua dingta hiam?. Zomi Council sik a hiaite dingta uh chihlah thupuan a omlam ka theikei zel a. Huaiziak in langbei khat ahihman un Innpite va kigolh nilouh zawlou in Bill-te withdraw/repeal ahita chih dinmun i tunma uh ana kisalah naikei maile uh hoihzaw lou hiam?

Salpha-te vuikhiat hileh mundang a kiphinna pailelte, a diak a MTFD kalsuanna bei phial khop a niamkiak dia gingta tinten ka hi. Tuaziak mah a awlmohna toh ka hon gelh ahi. Siluang om loupi a Coffin Rally chih in gen neilou ding hi. Written Assurance muhpih MTFD-te bangle resolution laak ma in rawn ahi ngal samkei du’a! Decision/resolutions laak ding chiang a bang ziak a ana huchi kin-gangtel uh le ahi? Theihsiam haksa eive. Mipi movement i panta ua, niteng nekzonna buaizen leh khopi a omte bangle office ginatak a kaai manlou zenzen a pangte kipiakna bangle i zahtakpih samkei ding maw. Hiai bang khop a mipi kiman hun a om nawnkei phial ding. Tua i leadership in mipi muanna a mansak ngeingeileh chikmah chiang in mipi i tokthou zou ngei nawnkei ding uh. Hichia tua i omdan a omdet ding chi hiding in lah i kigingta ngal kei a.

I thupuknate kheelthak in mipite sou bang le dawp saam ni. Delhi lamte bang siluang vuilouh a ni 100 a chin nini a Coffin Rally thupitak paipih dia kiman mahmah hunkhop ki-om eive. Siluangte kep haksat ziak a vui ding maw? I demand uh muhtheih a lohchinna a om chiang in hizaw ngal lou ding maw? Delhi lam a demand hoihleh taksa kinei panpanta a siluangte vui ding chih a vangkim a agin telzaw hon sulungke ngoihngoih nei ve ua. Rally a omsung nikhat le peellou a hoh ding; Peelkhak nini a Rs.100/- zel liau ziahziah dia kichiam mi 2/3 bang om ahi chih heutute’n a phawk khasam ding uam ah.